ვილნიუსში მიმდინარე აღმოსავლეთ პარტნიორობის სამიტის ფარგლებში საქართვველოს პრეზიდენტი გიორგი მარგველაშვილი ორმხრივ შეხვედრებს მართავს.
სასტუმრო „კემპინსკში" გიორგი მარგველაშვილი ევროპარლამენტის პრეზიდენტს მარტინ შულცს შეხვდა. მხარეებმა შეხვედრაზე განიხილეს საქართველოს ევროკავშირში ინტეგრაციის პერსპექტივები. საქართველოს პრეზიდენტმა მადლობა გადაუხადა მარტინ შულცს არაღიარების პოლიტიკასა და ევროპარლამენტის მიერ საქართველოსათვის სხვადასხვა სფეროებში გაწეული თანადგომისა და დახმარებისათვის.
შეხვედრაზე აღინიშნა საქართველოს მიერ ასოცირების ხელშეკრულების პარაფირების მნიშვნელობა. მარტინ შულცმა დადებითად შეაფასა საქართველოს ხელისუფლების ევროპული არჩევანი და აღნიშნა, რომ ევროპარლამენტი მომავალშიც განაგრძობს საქართველოს მხარდაჭერას ევროპული და ევრო-ატლანტიკური ინტეგრაციისა და დემოკრატიული აღმშენებლობის პროცესში.
პრეზიდენტის პრესსამსახურის ინფორმაციით, მხარეებმა ასევე ისაუბრეს სამიტის მნიშვნელობაზე და ევროკავშირში საქართველოსა და მოლდოვის პერსპექტივებზე.
ევროპარლამენტის პრეზიდენტმა იმედი გამოთქვა, რომ საქართველოს პრეზიდენტის ბრიუსელში ოფიციალური ვიზიტის ფარგლებში, უახლოეს პერიოდში მათი შეხვედრა ისევ შედგება.
შეხვედრის დასრულების შემდგომ, აღმოსავლეთ პარტნიორობის სამიტის ფარგლებში საქართველოს პრეზიდენტი საფრანგეთის რესპუბლიკის პრეზიდენტს ფრანსუა ოლანდს შეხვდება, რის შემდეგაც გაემართება სამიტის ოფიციალურ ნაწილზე დასასწრებად დელეგაციის სხვა წევრებთან ერთად.
