წარმოიშვა გაქვავებულ დოგმებსა და წეს-ჩვეულებებზე დამყარებული "ახალი ქრისტიანობა", - აცხადებს მწერალი ზურა ოდილავაძე გაზეთ "პრემიერისთვის" მიცემულ ინტერვიუში. მისი თქმით, საბჭოეთის დაშლის შემდეგ, ათასობით გაუნათლებელმა, საეჭვო რეპუტაციის მქონე ადამიანმა ეკლესიის მეშვეობით იპოვა საკუთარი თავი, იშოვა საქმე და შემოსავლის წყარო.
"საბჭოური მენტალობის მოძღვრები შეუდგნენ კომუნისტური იდეოლოგიის რწმენით ჩანაცვლებას. წარმოიშვა გაქვავებულ დოგმებსა და წეს-ჩვეულებებზე დამყარებული "ახალი ქრისტიანობა" _ რელიგია სიყვარულისა და თავგანწირვის გარეშე, ავტორიტეტებისადმი უკრიტიკო, მონური მორჩილებითა და ორმაგი, ფარისევლური სტანდარტებით _ ერთის აღიარებით ეკლესიაში და მეორის კეთებით გარეთ, ყოველდღიურ ცხოვრებაში _ ე.წ. "ტაძრული" რწმენა.
ამჯერად, კომუნიზმის მაგივრად, საქართველოს გაბრწყინება გამოცხადდა უზენაეს მიზნად, კერძოდ კი, სულების საყოველთაო და კვლავ "კოლექტიური" ცხონება. სარწმუნოებამ არა მხოლოდ ჩაანაცვლა კომუნისტური იდეოლოგია, არამედ თვით იქცა ტოტალიტარულ იდეოლოგიად.
ახლა უკვე ეს, იდეოლოგიად ქცეული "მართლმადიდებლობა", აღარ კმაყოფილდება ხალხის სულიერი წვრთნით, ის იჩენს ცხოველ ინტერესს და ერევა პოლიტიკაში, ეკონომიკაში, ცხოვრების ყველა სფეროში. დაწესებულებისა თუ კერძო პირის საზოგადოებრივი მსჯავრდადებით ეკლესიამ უკვე რეპრესიული ფუნქციაც შეიძინა. ყველაზე ცუდი კი ცალკეული ადამიანის "პრევენციული" შიში გახლავთ, რათა თავს არ დაატყდეს ეკლესიის რისხვა _ ასეთია რეპრესიების სავალალო შედეგი", - აცხადებს ოდილავაძე.