საქართველოს პრეზიდენტის ადმინისტრაცია აქვეყნებს გიორგი მარგველაშვილის მიმართვას აღმოსავლეთ პარტნიორობის სამიტზე, რომელიც პრეზიდენტმა გუშინ ვილნუსში გააჟღერა.
„ჯი-ეიჩ-ენი" მიმართვის ტექსტს უცვლელად გთავაზობთ:მოგესალმებით ყველას!
ქალბატონებო და ბატონებო,
ჩემთვის, როგორც საქართველოს ახლადარჩეული პრეზიდენტისთვის, დიდი პატივია ამ ისტორიულ მომენტში თქვენს გვერდით ყოფნა.
საქართველო მადლობას უხდის ევროკავშირს პოლიტიკური და ეკონომიკური მხარდაჭერისთვის მთელი ამ წლების განმავლობაში.
ჩვენ, ქართველებმა ვიცით, რომ ვართ ევროპელები, მაგრამ ისტორიული და გეოპოლიტიკური მიზეზების გამო, ჩვენ არ მოგვეცა საშუალება მონაწილეობა მიგვეღო ევროპული ინტეგრაციის საწყის ეტაპზე.
საქართველოს მოსახლეობის უმეტესობა და თითქმის ყველა ძირითადი პოლიტიკური პარტია მხარს უჭრს ევროპულ ინტეგრაციას, როგორც ჩვენი საგარეო პოლიტიკის ქვაკუთხედს.
დღეს ჩვენ მოვახდინეთ ევროკავშირთან ასოცირების ხელშეკრულებისა და ღრმა და ყოვლისმომცველი თავისუფალი სავაჭრო სივრცის შესახებ შეთანხმების პარაფირება.
ასოცირებისა და ღრმა და ყოვლისმომცველი თავისუფალი სავაჭრო სივრცის შესახებ ხელშეკრულებები ყველაზე მეტად ეფუძნება სწორედ საერთო ფასეულობებს:
კანონის უზენაესობა;
ადამიანის უფლებების დაცვა;
პასუხისმგებლობის მქონე და გულისხმიერი მთავრობა;
მდგრადი, საბაზრო მოთხოვნებზე დაფუძნებული ეკონომიკა, რომელიც ორიენტირებულია სოციალურად ყველაზე ნაკლებად უზრუნველყოფილი ადამიანების დაცვაზე.
ჩვენი ერთგულება ამ ფასეულობების მიმართ ცალსახაა. ეს დადასტურდა 2012 წლის საპარლამენტო არჩევნების შემდეგ, რომლის შედეგადაც მოხდა ძალაუფლების პირველი დემოკრატიული გადაბარება; ასევე თავისუფალი და სამართლიანი, ევროპული სტარნდარტების შესაბამისი 2013 წლის საპრეზიდენტო არჩევნებით, რომლის დროსაც ჩვენმა ამომრჩეველმა მმართველი ძალა მშვიდობიანი გზით შეცვალა.
ამ არჩევნებმა დაამტკიცა, რომ საქართველო გაცდა პოსტსაბჭოთა ეპოქას და ახლა პოლიტიკური სიმწიფისა და დემოკრატიული კონსოლიდაციის პროცესში იმყოფება.
ამ პოლიტიკურ კონტექსტში, ჩვენ ველით, რომ შესრულდება ამ სამიტის ფარგლებში ნაკისრი ვალდებულებები.
საგულისხმოა, რომ სამიტის შემდეგ ჩვენი ყველაზე დიდი მოლოდინია:
ასოცირებული წევრობის ხელშერულების ხელმოწერა, რომელიც მოიცავს შეთანხმებას ღრმა და ყოვლისმომცველი თავისუფალი ვაჭრობის შესახებ;
პროგრესის მიღწევა ევროკავშირის აღმოსავლეთ პარტნიორობის ეკონომიკურ სივრცეზე.
ევროპული სამზობლო ინსტრუმენტის (ENI) ფარგლებში, რეფორმებისა და განვითარების პროექტების თანაინვესტირება;
სავიზო რეჟიმის გამარტივება და, საბოლოოდ, უვიზო რეჟიმზე გადასვლა;
თანამშრომლობა უსაფრთხოებისა და თავდაცვის საერთო პოლიტიკის მიმართულებით;
· ხვალ ხელს მოვაწერთ ყოვლისმომცველ ხელშეკრულებას ევროკავშირის კრიზისის მართვის ოპერაციებში საქართველოს მონაწილეობის თაობაზე;
ენერგოტრანზიტული ქვეყნის რანგში - თანამშრომლობა ევროპის ენერგოუსაფრთხოების იმ ინიციატივების შესახებ, რომლებიც გულისხმობს კასპიის რეგიონის დაკავშირებას ევროპასთან; ასევე გაერთიანება ევროპის ენერგოსაზოგადოებასთან.
ჩვენ გვჭირდება ევროკავშირის მხარდაჭერა და ჩართულობა და ვიმედოვნებთ, რომ ევროკავშირი ცხადად დაუჭერს მხარს ჩვენს დამოუკიდებელ საგარეო პოლიტიკას გარე წნეხის პირობებში.
დიდი მადლობა ყურადღებისთვის.
