თბილისის საკრებულოში ადამიანის უფლებათა დაცვის და საზოგადოებასთან ურთიერთობის კომისიის სხდომა გაიმართა, რომელზეც 2014 წლის ბიუჯეტის პროექტში, ნარკომანიის ჩანაცვლებითი თერაპიისა და ფსიქო-თერაპიული რეაბილიტაციისათვის გასათვალისწინებელ თანხებზე იმსჯელეს.
სხდომას, რომელიც კომისიის თავმჯდომარის კახა კუკავას ინიციატივით ჩატარდა, თბილისის მერიის სოციალური მომსახურებისა და კულტურის საქალაქო სამსახურის უფროსის მოადგილე, სსიპ "ნარკომანიით დაავადებულ პირთა რეაბილიტაციის ცენტრის, ზიანის შემცირების საქართველოს ქსელისა და სამეცნიერო-კვლევითი ინსტიტუტის წარმომადგენლები ესწრებოდნენ. როგორც დედაქალაქის მერიის წარმომადგენელმა გიორგი სანიკიძემ როგორც დედაქალაქის მერიის წარმომადგენელმა გიორგი სანიკიძემ განმარტა, აღნიშნული პროგრამა 2011 წელს დაიწყო და თბილისის მთავრობა ბენეფიციარებს 25 პროცენტით აფინანსებს.
"პროგრამა 2011 წელს დაიწყო და საკმაოდ წარმატებითაც მიმდინარეობდა. თავდაპირველად დავაფინანსეთ 100 ბენეფიციარი და თითოეულ ადამიანზე მერია თვეში 150 ლარს გამოყოფდა. დღეის მონაცემებით კი უკვე 150 ბენეფიციარი გადის რეაბილიტაციას, რის გამოც თანხამ იკლო და ამ დროისათვის მათი დაფინანსება 110 ლარს შეადგენს. იმისათვის რომ ადამიანმა ბოლომდე გაიაროს რაბილიტაცია, აუცილებელია თანხების გაზრდა, რასაც მხოლოდ მივესალმები",- განაცხადა გიორგი სანიკიძემ.
როგორც თბილისის საკრებულოს ადამიანის უფლებათა დაცვის და საზოგადოებასთან ურთიერთობის კომისიის თავმჯდომარემ აღნიშნა, იმისათვის რომ საქართველოში ნარკომანიამ იკლოს, აუცილებელია სახელმწიფოს აქტიური ჩარევა.
"ნარკომანია ჩვენი ქვეყნის და ახალგაზრდების ძალიან სერიოზული და მზარდი პრობლემაა. მიმაჩნია, რომ მის აღმოსაფხვრელად სახელმწიფომ უნდა გადადგას ქმედითი ნაბიჯები. პროგრამები უნდა გახდეს ბევრად უფრო აქტიური, ინტენსიური და რაც ყველაზე მნიშვნელოვანია ხელმისაწვდომი.ჩვენი ამოცანაა მომავალი წლის ბიუჯეტში მოხდეს ამ თანხების გათვალისწინება, პარალელურად კი აუცილებლად განვახორციელებთ მონიტორინგს ჯანდაცვის სამინისტროსა და მერიის შესაბამის სამსახურებზე", - განაცხადა კახა კუკავამ.