აზიის განვითარების ბანკმა (ADB) საქართველოს მთავრობასთან გაფორმებული 73 მლნ დოლარის სასესხო ხელშეკრულება დაამტკიცა, რომლიც ფარგლებში დაგეგმილია თბილისი-რუსთავის სატრანსპორტო ინფრასტრუქტურის გაუმჯობესება და შავი ზღვის სანაპირო ზოლის გამაგრება ანაკლიაში. როგორც აზიის განვითარების ბანკში განმარტავენ, გაუმჯობესებული ინფრასტრუქტურა ხელს შეუწყობს ტრანსპორტის ნაკადის შემცირებას, გარემოს გაჯანსაღებას, საგზაო უსაფრთხოების დონის ზრდას და სამუშაო ადგილების შექმნას.
ბანკის ინფორმაციითვე, აღნიშნული სესხი წარმოადგენს 300 მლნ დოლარის მდგრადი ურბანული ტრანსპორტის საინვესტიციო პროგრამის მესამე ტრანშს. აღნიშნული პროგრამა აზიის განვითარების ბანკმა 2010 წელს საქართველოში ურბანული ტრასნპორტის განვითარების ხელშეწყობის მიზნით დაამტკიცა.
"სესხი ხელს შეუწყობს ურბანული სატრანსპორტო ქსელის ეფექტურობას და საიმედოობას, შექმნის ეკონომიურად მიმზიდველ გარემოს და სამუშაო ადგილებს, რაც შედეგად, გააუმჯობესებს გარემოს თბილისსა და ანაკლიაში" - განაცხადა აზიის განვითარების ბანკის ცენტრალური და დასავლეთ აზიის დეპარტამენტის ურბანული განვითარებისა და წყალმომარაგების განყოფილების დირექტორმა ანანდ ჩიპლუნკარმა.
როგორც ცნობილია, სესხის აღნიშნული ტრანშით დაფინანსდება თბილისი-რუსთავის დამაკავშირებელი ურბანული გზის მონაკვეთი და ქალაქ ანაკლიაში მიმდინარე ნაპირსამაგრი სამუშაოები. ინვესტიცია სარგებლობას მოუტანს მოსახლეობას მზარდი მობილურობითა და შემცირებული მგზავრობის დროის თვალსაზრისით. აზიის განვითარების ბანკის როგორც შეღავათიანი, ისე კომერციული რესურსებიდან მოზიდული ინვესტიციები შეამცირებს შავი ზღვის სანაპიროს ეროზიას ახალ კურორტზე ანაკლიაში.
"აღნიშნული პროექტები წარმოადგენს 1.45-მილიონიანი ურბანული დასახლების ეკონომიკისა და ტურიზმის განვითარების მთავარ ხელშემწყობ ფაქტორს. თბილისი-რუსთავის გზის მონაკვეთის მშენებლობა გააუმჯობესებს თბილისის ცენტრთან დამაკავშირებელ გზას, შეამცირებს საცობებს და შეამცირებს საგზაო შემთხვევებსა და გარემოს დაბინძურებას" _ აღნიშნა აზიის განვითარების ბანკის ცენტრალური და დასავლეთ აზიის დეპარტამენტის ურბანული განვითარების სპეციალისტმაბერტრან გოალუმ.
თბილისი-რუსთავის საგზაო მონაკვეთის გაუმჯობესება კიდევ უფრო შეუწყობს ხელს რეგიონულ განვითარებას, რადგან ეს და ინვესტიციების საშუალებით დაფინანსებული სხვა პროექტები წარმოადგენს საქართველოს გავლით თურქეთის აზერბაიჯანთან დამაკავშირებელი აღმოსავლეთ-დასავლეთ დერეფნის ნაწილს. ეს არის ტრანსკავკასიური და ევრაზიული ქსელის ერთ-ერთი ძირითადი სავაჭრო დერეფანი.
მანილაში მდებარე აზიის განვითარების ბანკის ძირითადი საქმიანობაა აზიასა და წყნარი ოკეანის რეგიონში სიღარიბის დაძლევა რეგიონული ინტეგრაციის, ეკონომიკური და მდგრადი გარემოს განვითარებისა გზით. აზიის განვითარების ბანკი დაარსდა 1966 წელს, იგი შედგება 67 წევრი სახელმწიფოსგან მათ შორის 48 _ რეგიონიდან არის. 2011 წელს აზიის განვითარების ბანკის მიერ დამტკიცებული სესხების ოდენობამ, თანადაფინანსების ჩათვლით, 21 მლრდ დოლარი შეადგინა. 2007 წლიდან დღემდე საქრთველოსთვის 1.1 მლრდ დოლარზე მეტია დამტკიცებული.
