მედიის ცნობით, მოსამართლე ლელა მარიდაშვილმა არასრულწლოვნის ცემაში ბრალდებული მკლავჭიდელი ქალი, ხატია ვიბლიანი სხდომათა დარბაზიდან გააძევა. მიზეზად მოსამართლემ სასამართლოსთვის შეუსაბამო ჩაცმულობა დაასახელა.
სხდომის დაწყებამდე ჟურნალისტებმა მკლავჭიდელ ქალს კითხვები დაუსვეს.
ვიბლიანმა ჟურნალისტებთან თქვა, რომ ძალადობას არ ემხრობა, "უბრალოდ ყველამ უნდა ვიცოდეთ მოქცევის წესები".
"რა თქმა უნდა, არ ვიცოდი [რომ არასრულწლოვანი იყო], როცა ჩემი ბულინგი წავიდა, მერე გავიგე... მე გიჟი არ ვარ... მე ვარ თავმოყვარე ქალი და ვარ მშობელი, დედა, მეტს არ ვიტყვი არაფერს ამ ეტაპზე. გამოძიების დაწყების შემდეგ, აუცილებლად ვისაუბრებ ამაზე.
ძალადობას არ ვემხრობი, უბრალოდ ყველამ უნდა ვიცოდეთ მოქცევის წესები.
ამას [ძალადობას] ვაღიარებ, მაგრამ ჩემს ადგილას თავმოყვარე მშობელი რაღაცას გააკეთებდა, როცა თავს ესხმიან.
მე ვარ თავმოყვარე ქალი და ვარ დედა, მეტს არ ვიტყვი არაფერს ამ ეტაპზე". - თქვა ვიბლიანმა.
ცნობისთვის, ხატია ვიბლიანს პროკურატურამ წინასწარი შეცნობით არასრულწლოვანის მიმართ განხორციელებულ ძალადობის ფაქტზე წარუდგინა ბრალდება.
გამოძიების ინფორმაციით, მიმდინარე წლის 11 სექტემბერს, თბილისში, ერთ-ერთ მაღაზიაში ბრალდებულმა ვიბლიანმა ფიზიკური შეურაცხყოფა მიაყენა არასრულწლოვანს, შემდეგ კი მაღაზიის მიმდებარედ გააგრძელა მასზე ფიზიკური ძალადობა.
