საპარლამენტო უმცირესობის წევრი გიგი წერეთელი მთავარ პროკურატურაში მიმდინარე საკადრო ცვლილებებს ეხმიანება. როგორც ჟურნალისტებთან წერეთელმა განმარტა მთავარია, ახალმა ცვლილებებმა პროკურატურაში კიდევ უფრო აგრესიული დამოკიდებულება არ მოიტანოს.
,,მწარიაშვილს დიდი ხანია, ვიცნობ და ვფიქრობ, როგორც იურისტი და პროფესიონალი ის, შესაძლებელია, საკმაოდ კარგიც არის, მაგრამ როდესაც მოდის ახალი პროკურორი ან ნებისმიერი უწყების ხელმძღვანელი, მას ბუნებრივია, აქვს უფლება, ცვლილებები შეიტანოს სტრუქტურებშიც, პიროვნებებშიც, იმიტომ, რომ ამ გუნდზე პასუხისმგებლობა მას ეკისრება. მთავრია, ამ ახალმა ცვლილებებმა პროკურატურაში არ მოიტანოს კიდევ უფრო აგრესიული დამოკიდებულება. პირველ რიგში, მხედველობაში მაქვს ბევრი საქმე, რომელიც არსებობს, განსაკუთრებით ისინი, რომლებზეც მიანიშნებენ, რომ არსებობს მოტივები პოლიტიკური საფუძვლებით აღძვრისა. ხელისუფლების ზოგიერთი წარმომადგენელი არ იყო კმაყოფილი სამართლიანობის აღდგენის ტემპებით, პირდაპირ ვთქვათ, დაპატიმრებული ადამიანების რაოდენობით და შესაძლებელია, ამან გარკვეული გავლენა იქონიოს პროკურატურის საქმიანობაზე მომავალში. მე ამას ნამდვილად არ მივესალმები. ვფიქრობ, რომ პროკურატურამ უპირველეს ყოვლისა, კანონის უზენაესობაზე დაფუძნებული გადაწყვეტილებები უნდა მიიღოს", - განაცხადა გიგი წერეთელმა.
