საპარლამენტო უმცირესობა მთავრობის ახალ შემადგენლობას და ახალი პრემიერ-მინისტრის კანდიდატურას მხარს არ დაუჭერს. პრემიერ-მინისტრობის კანდიდატის საპარლამენტო მოსმენის შემდეგ, უმცირესობის ერთ-ერთმა ლიდერმა გოკა გაბაშვილმა ირაკლი ღარიბაშვილს პარლამენტში გამოსვლის ტაქტიკა დაუწუნა და განუმარტა, რომ საქართველოს პრემიერ-მინისტრობის კანდიდატი არ უნდა იქცეოდეს ისე, რომ ელემენტარულად უდანაშაულობის პრეზუმციას არღვევდეს.
„ასეთ მწვავე დისკუსიასაც არ მოველოდით, რადგანაც ჩემი აზრით ბატონო ირაკლი აბსოლუტურად უპასუხისმგებლო სტრატეგია აირჩიეთ, აქ მოსვლისა. ასე ნამდვილად არ უნდა იქცეოდეს საქართველოს პრემიერ-მინისტრობის კანდიდატი. არ არღვევდეს ყველა ნორმას, რომელიც ცივილიზებული საზოგადოებისთვის მისაღებია, უდანაშაულობის პრეზუმციიდან დაწყებული და ზრდილობით დამთავრებული. ჩვენთვის თქვენ ხართ ყველაზე წარუმატებელი დროის მთავრობა, რომელიც უცვლელადაა წარმოდგენილი. თქვენ ხართ მთავრობა, რომელმაც მრავალი ასეულობით მილიონი ლარით გაარღვია საქართველოს ბიუჯეტი და პრაქტიკულად შეაჩერა ეკონომიკური ზრდა. შესაბამისად შევაჯამებთ იმით, რომ თქვენ უმცირესობის მხარდაჭერას ვერ მოიპოვებთ"- განაცხადა გოკა გაბაშვილმა შემაჯამებელი სიტყვის წარმოთქმისას.
