საპარლამენტო კომიტეტები მინისტრობის კანდიდატებს 19 ნოემბერს მოუსმენენ. როგორც ჟურნალისტებთან პარლამენტის თავმჯდომარემ დავით უსუფაშვილმა განაცხადა მთავრობის ახალ შემადგენლობას დეპუტატები კენჭს ოთხშაბათს, 20 ნოემბერს უყრიან.
"პრეზიდენტ მარგველაშვილის მიერ ფიცის დასრულების წამიდან ძალაში შევიდა საქართველოს კონსტიტუციის ის ახალი მოდელი, რომელიც 2010 წლიდან იქნა მიღებული და ამ წუთიდან პარლამენტიც ახალ რეალობაშია, პრემიერ-მინისტრიც და პრეზიდენტიც, თავისი პასუხისმგებლობით და კომპეტენციით. რაც შეეხება პრემიერ-მინისტრობის კანდიდატის მიერ წარმოდგენილი მთავრობის შემადგენლობის და მისი პროგრამის განხილვის გრაფიკს: სამშაბათს, დღის პირველ ნახევარში საკომიტეტო მოსმენები გაიმართება და ყველა კომიტეტი იმ მინისტრს შეხვდება, რომელთანაც კომპეტენციებით იკვეთება ზოგიერთ მინისტრს ორ-სამ კომიტეტში მოუწევს მისვლა. სამშაბათსვე, დღის მეორე ნახევარში შედგება უმცირესობასა და უმრავლესობასთან შეხვედრები, უკვე ოთხშაბათს კი კენჭი ეყრება მთავრობის ახალ შემადგენლობას და პროგრამას", _ განაცხადა უსუფაშვილმა.
