საქართველოს პარლამენტი მინისტრთა კაბინეტის ახალ შემადგენლობას 20 ნომებერს უყრის კენჭს. ამის შესახებ პარლამენტის თავმჯდომარემ დავით უსუფაშვილმა განაცხადა.
მისივე თქმით, მინისტრობის კანდიდატებს საპარლამენტო კომიტეტები 19 ნოემბერს მოუსმენენ.
"პარლამენტიც ახალ რეალობაშია, პრემიერ-მინისტრიც და პრეზიდენტიც, თავისი პასუხისმგებლობით და კომპეტენციით. რაც შეეხება პრემიერ-მინისტრობის კანდიდატის მიერ წარმოდგენილი მთავრობის შემადგენლობის და მისი პროგრამის განხილვის გრაფიკს: სამშაბათს, დღის პირველ ნახევარში საკომიტეტო მოსმენები გაიმართება და ყველა კომიტეტი იმ მინისტრს შეხვდება, რომელთანაც კომპეტენციებით იკვეთება - ზოგიერთ მინისტრს ორ-სამ კომიტეტში მოუწევს მისვლა. სამშაბათსვე, დღის მეორე ნახევარში შედგება უმცირესობასა და უმრავლესობასთან შეხვედრები, უკვე ოთხშაბათს კი კენჭი ეყრება მთავრობის ახალ შემადგენლობას და პროგრამას", - განაცხადა უსუფაშვილმა.
პარლამენტის თავმჯდომარის თქმით, კენჭისყრამდე დეპუტატებს მთავრობის ახალ შემადგენლობას და პროგრამას თავად პრემიერ-მინისტრობის კანდიდატი ირაკლი ღარიბაშვილი წარუდგენს.
"დარწმუნებული ვარ, პარლამენტში იქნება საინტერესო გამოსვლები და დებატები. ამის შემდეგ გაიმართება კენჭისყრა და ოთხშაბათიდან საქართველოს ახალი მთავრობა ეყოლება", - განაცხადა პარლამენტის თავმჯდომარემ.
