საქართველოს პრეზიდენტი გიორგი მარგველაშვილი დღეს საღამოს დაგეგმილ ოფიციალურ მიღებაზე 1 700-მდე სტუმარს უმასპინძლებს.
ახლადარჩეული პრეზიდენტის პირველი ოფიციალური მიღება სასტუმრო "შერატონ მეტეხი პალასში" მას შემდეგ დაიწყება, რაც ინაუგურაციის ფარლებში საქართველოში სტუმრად მყოფი სხვადასხვა ქვეყნების დელეგაციების წარმომადგენლები შოთა რუსთაველის სახელობის სახელმწიფო დრამატულ თეატრში დაგეგმილ "ერისონის" კონცერტს დაესწრებიან და ქართველი მომღერლების მონაწილეობით გასამართ კონცერტს მოუსმენენ.
როგორც სასტუმრო "შერატონ მეტეხი პალასის" ადმინისტრაციაში განმარტავენ, დღევანდელი დღის შემაჯამებელი ღონისძიებისთვის დილიდან ემზადებიან, ამიტომ სასტუმროს მენეჯმენტი სრულ მზადყოფნაშია საზეიმო მიღებაზე მიწვეულ სტუმრებს ღირსეული მასპინძლობა გაეწიოს.
"ღონისძიებაზე სიტყვით გამოვა პრეზიდენტი. მოხარული ვარ, რომ სწორე ჩვენ ვმასპინძლობთ ამ მიღებას. მოწვეულია 1 700 სტუმარი და ჩვენ მათ მასპინძლობას გავუწევთ,"- განაცხადა სასტუმროს გენერალურმა მენეჯერმა.
რუსთაველის თეატრში დღევანდელი დღის დასკვნითი კულტურული ღონისძიება - ანსამბლ "ერისიონის" კონცერტი ამ წუთებში იწყება. კულტურულ საღამოზე სხვადასხვა მუსიკალურ ნომრებს ქართველი მომღერლებიც შეაასრულებენ.
ჯერჯერობით საქართველოს პრეზიდენტი გიორგი მარგველაშვილი რუსთაველის თეატრში არ მისულა და საზეიმო ღონისძიება სწორედ მისი მისვლის შემდეგ დაიწყება.
ახლადარჩეული პრეზიდენტი გიორგი მარგველაშვილი ქვეყნის პირველი პირი ოფიციალურად გახდა. მან პარლამენტის ძველი შენობის შიდა ეზოში გამართულ ინაუგურაციის ცერემონიალზე ფიცი ქვეყნის კონსტიტუციაზე და ბიბლიაზე დადო.
მარგველაშვილის ინაუგურაციას 53 ქვეყნის ოფიციალური დელეგაცია დაესწრო. სტუმრებს შორის ევროკავშირის თავმჯდომარე ქვეყნის პრეზიდენტი დალია გრიბაუსაკაიტე და სხვადასხვა ქვეყნების პრემიერ-მინისტრები, მინისტრები, მინისტრის მოადგილეები და ელჩები იყვნენ. გიორგი მარგველაშვილის ინაუგურაციის ცერემონიალს საქართველოს ყოფილი პრეზიდენტები - ედუარდ შევარდნაძე და მიხეილ სააკაშვილი არ დასწრებიან. ღონისძიებაზე არც საპარლამენტო ოპოზიციის წარმომადგენლები მივიდნენ.
