ძალიან ამაღლებულია განწყობა და სრულიად საქართველოს კიდევ ერთხელ ვულოცავ,- ამის შესახებ საქართველოს განათლებისა და მეცნიერების მინისტრმა თამარ სანიკიძემ არჩეული პრეზიდენტის გიორგი მარგველაშვილის ინაუგურაციის ცერემონიალზე დასწრების შემდეგ ჟურნალისტებთან საუბრისას განაცხადა.
"ძალიან ამაღლებულია განწყობა, ვულოცავ სრულიად საქართველოს კიდევ ერთხელ, ნამდვილად საზეიმო დღეა და მინდა კიდევ ერელ და კიდევ ბევრჯერ წარმატება ვუსურვო საქართველოს ახალ პრეზიდენტს გიორგი მარგველაშვილს თავის მომავალ საქმიანობაში,"- განაცხადა თამარ სანიკიძემ.
ახლადარჩეული პრეზიდენტი გიორგი მარგველაშვილი ქვეყნის პირველი პირი ოფიციალურად გახდა. მან პარლამენტის ძველი შენობის შიდა ეზოში გამართულ ინაუგურაციის ცერემონიალზე ფიცი ქვეყნის კონსტიტუციაზე და ბიბლიაზე დადო.
მარგველაშვილის ინაუგურაციას 53 ქვეყნის ოფიციალური დელეგაცია დაესწრო. სტუმრებს შორის ევროკავშირის თავმჯდომარე ქვეყნის პრეზიდენტი დალია გრიბაუსაკაიტე და სხვადასხვა ქვეყნების პრემიერ-მინისტრები, მინისტრები, მინისტრის მოადგილეები და ელჩები იყვნენ. გიორგი მარგველაშვილის ინაუგურაციის ცერემონიალს საქართველოს ყოფილი პრეზიდენტები - ედუარდ შევარდნაძე და მიხეილ სააკაშვილი არ დასწრებიან. ღონისძიებაზე არც საპარლამენტო ოპოზიციის წარმომადგენლები მივიდნენ.
