დღეს, მთავრობის კანცელარიაში ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი კავკასიასა და ცენტრალურ აზიაში ნატო-ს გენერალური მდივნის სპეციალურ წარმომადგენელს ჯეიმს აპატურაის შეხვდა, რომელიც საქართველოში პრეზიდენტის ინაუგურაციაზე დასასწრებად ჩამოვიდა.
შეხვედრაზე მხარეებმა ისაუბრეს საქართველოში მიმდინარე დემოკრატიულ პროგრესზე, წარმატებულად ჩატარებულ არჩევნებსა და მისი მნიშვნელობაზე. განიხილეს საქართველოს ნატოში ინტეგრაციის პროცესის დინამიკა და უახლოესი პერსპექტივები. განსაკუთრებით დადებითად შეფასდა 2013 წლის წლიური ეროვნული პროგრამის შესრულება. იმსჯელეს შემდეგი სამიტის მოლოდინზე და ხაზგასმით აღინიშნა, რომ სამიტზე მიღებული გადაწყვეტილებებში უნდა აისახოს საქართველოს პროგრესი. ალექსი პეტრიაშვილმა და ჯეიმს აპატურაიმ ასევე, ისაუბრეს ვილნიუსის სამიტის მოლოდინებსა და სამიტის მოახლოებასთან ერთად რუსეთის მხრიდან აღმოსავლეთ პარტნიორობის ქვეყნებზე გაძლიერებული ზეწოლის შესახებ.
როგორც შეხვედრის დასრულების შემდეგ ალექსი პეტრიაშვილმა ჟურნალისტებთან განაცხადა: „ჩვენ მოხარულები ვართ, რომ საქართველომ საუკეთესო ეროვნული პროგრამა წარმოადგინა და ყველა მიმართულებით მოახდინა პროგრესის დემონსტრირება. ეს ძალიან საამაყოა ჩვენთვის, ჩვენი ხელისუფლებისთვის და რა თქმა უნდა მთელი ქვეყნისთვის. მეორე, ძალიან მნიშვნელოვანი, რომ ნატო უმაღლეს შეფასებას აძლევს საქართველოში ჩატარებულ საპრეზიდენტო არჩევნებს და მოხარულები ვართ, რომ ბატონი აპატურაი ესწრება პრეზიდენტის ინაუგურაციას. მესამე-განსაკუთრებით აღინიშნა, რომ მომავალი ნატოს სამიტისთვის უნდა იყოს მიღებული გადაწყვეტილება, რომელიც ადექვატურად ასახავს საქართველოს მიერ მიღწეულ პროგრესს დემოკრატიული განვითარების გზაზე და საერთაშორისო უასაფრთხოების კონტრიბუციის კონტექსტში."
შეხვედრის დასრულების ასევე, ჟურნალისტებთან კომენტარი გააკეთა ნატოს გენერალური მდივნის სპეციალურმა წარმომადგენელმა და აღნიშნა, რომ წლევანდელი წლიური ეროვნული პროგრამა საუკეთესო და კარგად მომზადებული დოკუმეტია წინა წლებთან შედარებით, რომელიც ნათლად ასახავს ქვეყნის პროგრესს. ასევე, განვიხილეთ დემოკრატიული პროგრესი ამ ქვეყანაში და ვარ ძალიან ამაყი, რომ ვიმყოფები აქ პრეზიდენტის ინაუგურაციაზე. ეს პროცესი ქვეყნისათვის ძალიან ბევრს ნიშნავს. სწორედ ეს იყო ის, რის იმედსაც გამოხატავდნენ მოკავშირეები ჩიკაგოს სამიტზე. ეს არის ძალიან პოზიტიური მოვლენა როგორც საქართველოსთვის, ისე პარტნიორობისთვის. ჩვენ ვიყურებით წინ, საქართველო ისწრაფვის ნატოს წევრობისკენ და ამ კუთხით სახელმწიფო მინისტრი ამის განსახორციელებლად ძალისხმევას არ იშურებს. ჩვენ ვმსჯელობთ, თუ რა ნაბიჯი უნდა გადაიდგას წინ საქართველოს ნატოში ინტეგრაციის გზაზე.