რეინტეგრაციის საკითხებში სახელმწიფო მინისტრი პაატა ზაქარეიშვილის სააგენტო „ჯი-ეიჩ-ენის" კითხვაზე პასუხად ტერმინ „გამყოფ ხაზთან" დაკავშირებით განმარტებას აკეთებს და აცხადებს, რომ საპარლამენტო უმცირესობის წარმომადგენლის ჩიორა თაქთაქიშვილის პოლიტიკურ უმეცრებას საზღვარი არ აქვს. მინისტრი ასევე ურჩევს დეპუტატს, რომ ვიდრე საქართველოს ამჟამინდელი ხელისუფლების მიმართ მსგავს ბრალდებებს გამოთქვამს, გულდასმით წაიკითხოს და გაეცნოს წინა ხელისუფლების მიერ მიღებულ კანონებსა და ნორმატიულ აქტებს.
„საპარლამენტო უმცირესობის წარმომადგენლის ჩიორა თაქთაქიშვილის პოლიტიკურ უმეცრებას საზღვარი არ აქვს. ამჯერად, მან გააკრიტიკა დროებითი სამთავრობო კომისიის სახელწოდებაში ტერმინ „გამყოფი ხაზის" გამოყენება. ამასთან დაკავშირებით დეპუტატმა საკუთარი პოზიცია სოციალურ ქსელშიც დააფიქსირა.
კერძოდ, თაქთაქიშვილი აცხადებს: „მთავრობის ოფიციალური პოზიციაა, რომ საქართველოში აღმართული საოკუპაციო ხაზი არის თურმე "გამყოფი ხაზი", საქართველოს მთავრობა მიიჩნევს, რომ აფხაზეთი და სამაჩაბლო ოკუპირებული კი არაა და შესაბამისად ოკუპანტი კი არ არსებობს, არამედ თურმე გაუგებარი მიზეზით არის გაყოფილი!!! ეს წერია მთავრობის დადგენილებაში და ამაზე პასუხს აგებს თითოეული მინისტრი.", _ მოჰყავს ზაქარეიშვილს თაქთაქიშვილის კომენტარი და აღნიშნავს, რომ ეს ტერმინი არა ამჟამინდელი ხელისუფლების მიერ, არამედ „ნაციონალურ მოძრაობის" მმართველობის წლებშია შემოღებული და დამკვიდრებული.
„გვსურს, განვუმარტოთ დეპუტატ ჩიორა თქთაქიშვილს, რომ ტერმინი „გამყოფი ხაზები" ქართულ კანონმდებლობაში შემოღებული და დამკვიდრებულია არა ამჟამინდელი ხელისუფლების მიერ, არამედ „ნაციონალური მოძრაობის" მმართველობის წლებში. კერძოდ: ჩანაწერი „გამყოფი ხაზი" წარმოადგენს ოფიციალურად დამკვირდებულ ტერმინს შემდეგი დოკუმენტით - ,,სახელმწიფო სტრატეგია ოკუპირებული ტერიტორიების მიმართ _ ჩართულობა თანამშრომლობის გზით დამტკიცების შესახებ", რომელიც საქართველოს მთავრობამ 2010 წლის 27 იანვარს დაამტკიცა.
აღნიშნული სტარტეგიის ტექსტში „გამყოფი ხაზი" 15-ჯერ არის გამოყენებული, ხოლო „საოკუპაციო ხაზი" დოკუმენტში ერთხელაც არ არის ნახსენები. აღნიშნულ სტრატეგიას ეყრდნობოდა და ეყრდნობა საქართველოს წინა და ამჟამინდელი პოლიტიკა ოკუპირებული ტერიტორიების მიმართ", _ განმარტავს მინისტრი და აღნიშნავს, რომ ამავე დოკუმენტზე დაყრდნობით, ჩანაწერი ,,გამყოფი ხაზი" გამოყენებულია ,,საქართველოს 2012 წლის სახელმწიფო ბიუჯეტის შესახებ" და ,,საქართველოს 2013 წლის სახელმწიფო ბიუჯეტის შესახებ" საქართველოს კანონებში.
„იგი გამოყენებულია აგრეთვე „საქართველოს ეროვნული უსაფრთხოების კონცეფციის" დამტკიცების შესახებ საქართველოს პარლამენტის 2011 წლის 23 დეკემბრის N5589-რს დადგენილებაში.
რაც შეეხება ტერმინებს ,,საოკუპაციო ზოლი" და ,,საოკუპაციო ხაზი" იგი მხოლოდ ერთხელ იქნა გამოყენებული ოფიციალურად საქართველოს პრეზიდენტის 2013 წლის N331 ბრძანებულებით დამტკიცებული ,,თავდაცვის სტრატეგიული მიმოხილვა 2013-2016" დოკუმენტში",_ აცხადებს მინისტრი და ხაზგასმით აღნიშნავს, რომ შესაბამისად, საქართველოს მთავრობამ ზემოხსენებული დროებითი სამთავრობო კომისიის სახელწოდების განსაზღვრისას ისარგებლა უკვე არსებული სამართლებრივი აქტებით ოფიციალურად დადგენილი ტერმინოლოგიით.
„აღვნიშნავ, რომ ეს არ არის პირველი შემთხვევა, როცა საპარლამენტო უმცირესობის წარმომადგენელი, ქალბატონი ჩიორა თაქთაქიშვილი ცდილობს, საზოგადოება შეცდომაში შეიყვანოს და საქართველოს წინა ხელისუფლების მიერ გადადგმული ნაბიჯები ამჟამინდელი ხელისუფლების ნამოქმედარად წარმოაჩინოს.
მაგალითისთვის გამოდგება მის მიერ მიმდინარე წლის ივნისში ახალი მთავრობის დადანაშაულების მცდელობა, თითქოსდა, ახალმა ხელისუფლება ე.წ. აფხაზური და ოსური პასპორტების ვალიდურობა აღიარა. ჩვენ ქალბატონ თაქთაქიშვილს მაშინაც განვუმარტეთ, რომ ოკუპირებულ ტერიტიროებზე უკანონო ორგანოების მიერ გაცემული აღნიშნული დოკუმენტების გამოყენების წესები განსაზღვრულია 2008 წლის 30 ოქტომბერს მიღებული კანონით ოკუპირებული ტერიტორიების შესახებ (მე-8 მუხლი), საქართველოს იუსტიციის მინისტრის 2011 წლის 11 ოქტომბრის №133 ბრძანებით "პირადობის ნეიტრალური მოწმობის და ნეიტრალური სამგზავრო დოკუმენტის გაფორმების, გაცემის და გაუქმების წესის დამტკიცების შესახებ", საქართველოს მთავრობის 2010 წლის 3 ნოემბრის დადგენილებით "რეფერალური მომსახურების" ფარგლებში შესაბამისი სამედიცინო დახმარების გაწევის შესახებ გადაწყვეტილების მიღების მიზნით კომისიის შექმნისა და მისი საქმიანობის წესის განსაზღვრის შესახებ"", _აცხადებს ზაქარეიშვილი დეპუტატ ჩიორა თაქთაქიშვილს ურჩევს ვიდრე საქართველოს ამჟამინდელი ხელისუფლების მიმართ მსგავს ბრალდებებს გამოთქვამს, გულდასმით წაიკითხოს და გაეცნოს წინა ხელისუფლების მიერ მიღებულ კანონებსა და ნორმატიულ აქტებს.
„ვურჩევ დეპუტატ ჩიორა თაქთაქიშვილს, ვიდრე საქართველოს ამჟამინდელი ხელისუფლების მიმართ მსგავს ბრალდებებს გამოთქვამს, გულდასმით წაიკითხოს და გაეცნოს წინა ხელისუფლების მიერ მიღებულ კანონებსა და ნორმატიულ აქტებს. სხვათა შორის, რაც შეეხება მის მიერ გამოყენებულ ტერმინს „სამაჩაბლო". ვურჩევთ ქალბატონ თაქთაქიშვილს, გაეცნოს 2008 წლის 12 აგვისტოს სააკაშვილი-სარკოზის 6 პუნქტიანი შეთანხმების მეექვსე პუნქტს (თუ დანარჩენი 5 პუნქტის წაკითხვა დაეზარება)",_ განმარტავს ბოლოს მინისტრი.