პატიმრობაში მყოფი ,,ნაციონალური მოძრაობის" გენერალური მდივანი ვანო მერაბიშვილი მის საქმესთან დაკავშირებით სოციალურ ქსელში განცხადებას ავრცელებს, სადაც აღნიშნულია, რომ სასამართლო სხდომების ხშირ-ხშირად ჩანიშვნა მისი და მისი ადვოკატების, გულშემატკივრების წვალებას ისახავს მიზნად. ,,ჯი-ეიჩ-ენი" მერაბიშვილის განცხადებას უცვლელად გთავაზობთ: ,,მიუხედავად ქუთაისის საქალაქო სასამართლოსადმი ჩემი არაერთი თხოვნისა, არ გაემართათ სასამართლო პროცესები ყოველდღიურად, სასამართლო აგრძელებს სხდომების თითქმის ყოველდღიურ რეჟიმში ჩატარებას. იმის გათვალისწინებით, რომ პროკურატურას არ ჰყავს არც ერთი მოწმე და არ აქვს არც ერთი მტკიცებულება, რომელიც ჩემი და ზურაბ ჭიაბერაშვილის ბრალეულობას დაამტკიცებს, სხდომის ასე ხშირად ჩანიშვნა ჩემი, ჩემი ადვოკატების და გულშემატკივრების წვალებას ისახავს მიზნად.
ქუთაისის სასამართლოს სურს გაამართლოს პროკურატურის 3969 მოწმის არსებობა და ქმნის იმის იმიჯს, რომ სასამართლო მაქსიმალურად ცდილობს ყველა მოწმის დაკითხვას მიუხედავად იმისა, რომ ბრალდების არცერთი მოწმე არ იძლევა ჩვენს საწინააღმდეგო ჩვენებას, ზოგიერთი მათგანი კი საერთოდ ჩვენს უდანაშაულობას ამტკიცებს. ყველა მალე მიხვდება, რომ თვით გურულის სასამართლოც კი პროკურატურის მოწმეების 10%-საც ვერ დაკითხავს. მე ბოდიშს ვუხდი ჩემს მეგობარს ზურაბ ჭიაბერაშვილს და ჩემს ადვოკატებს, რომლებიც ჩემს წინააღმდეგ მიმდინარე დევნის მსხვერპლნი გახდნენ. იმედს ვიტოვებ, რომ მომავალში მაინც მომეცემა საშუალება და შევძლებ დავესწრო ქუთაისში მიმდინარე რამდენიმე სასამართლო პროცესს", _ნათქვამია განცხადებაში.
