თბილისის მერი გიგი უგულავა გიორგი მარგველაშვილის ინაუგურაციას არ დაესწრება.
უგულავას თქმით, დედაქალაქის მერია უშუალოდ არის დაკავებული ახალი პრეზიდენტის ინაუგურაციის ღონისძიების მოსამზადებელი სამუშაოების ორგანიზებით, თუმცა პირადად იგი საზეიმო ღონისძიებაზე დასწრების მიზეზს ვერ ხედავს.
უგულავა აღნიშნავს, რომ მარგველაშვილს საპრეზიდენტო არჩევნებში გამარჯვება პირველივე დღეს პირადად მიულოცა, თუმცა იმ ადამიანის ზეიმში მონაწლეობას ვერ მიიღებს, ვისაც ქვეყნის მტრისა და მოყვარის ერთმანეთისგან გარჩევა არ შეუძლია.
"მერია ინსტიტუციურად მონაწილეობს საინაუგურაციო მოსამზადებელ სამუშაოებში. იმის გამო, რომ პატივს ვცემ ჩვენი მოქალეების არჩევანს, მე პირველივე დღეს მივულოცე გამარჯვება ბატონ გიორგის. რაც შეეხება ინაუგურაციაზე დასწრებას, მე არ ვაპირებ იმიტომ, რომ იმ ადამიანის ზეიმში, ვისაც ვერ გაურჩევია ქვეყნის მტერი და მოყვარე, მე მონაწილეობა გამიჭირდება,"- განაცხადა გიგი უგულავამ.
