რეინტეგრაციის საკითხებში სახელმწიფო მინისტრის პაატა ზაქარეიშვილის განცხადებით, სოჭის ზამთრის ოლიმპიურ თამაშებზე საქართველოს პოლიტიკური დელეგაციის გამგზავრებაში იგი პრობლემას ვერ ხედავს.
ზაქარეიშვილის თქმით, ნაადრევი დასკვნებისგან ყველამ თავი უნდა შეიკავოს. ის ასევე მთავრობას გონივრული და არაემოციური გადაწყვეტილების მიღებას ურჩევს.
"ოლიმპიურმა კომიტეტმა მიიღო გადაწყვეტილება, რომ მიიღოს მონაწილეობა ოლიმპიადაში. ანუ, თუ არაფერი არ შეიცვალა, მივდივართ ოლიმპიადაზე. ეს არ ნიშნავს, რომ აუცილებლად წავალთ, თუ რაღაცა შეიცვალა და ვითარება დაიძაბა, მაშინ ამ საკითხს დავუბრუნდებით. რაც შეეხება პრეზიდენტის გამგზავრებას, ხვალ რომ ტარდებოდეს ოლიმპიადა, და მე რომ მთხოვონ განვიხილოთ ეს თემა, ვიტყოდი, რომ ალბათ ჯობია წავიდეს. ასე ვიტყოდი მე, მაგრამ თებერვლამდე რა მოხდება, ნამდვლად არ ვიცი და შესაბამისად დღეს ვიტყოდი, რომ მოვიცადოთ,"- განაცხადა პაატა ზაქარეიშვილმა.
ცნობისთვის, არჩეულმა პრეზიდენტმა გიორგი მარგველაშვილმა რუსული ტელეკომპანია "ORT"-სთვის მიცემულ ინტერვიუში რუსეთ-საქართველოს ურთიერთობებზე, სოჭის ოლიმპიადაზე და აღნიშნულ ოპლიმპიადაზე მისი ვიზიტის შესაძლებლობაზე ისაუბრა.
ჟურნალისტის კითხვაზე - ლიდერები ხშირად ჩამოდიან თავიანთი გუნდების მხარდასაჭერად, ან ოლიმპიადის დახურვაზე და გახსნაზე. თქვენ აპირებთ ჩამოსვლას?, მარგველაშვილმა უპასუხა, რომ ამ საკითხს გუნდში განიხილავს და შესაბამის გადაწყვეტლებას მხოლოდ ამის შემდეგ მიიღებს.
