მანანა მანჯგალაძემ პრეზიდენტის პრესსპიკერის თანამდებობა დატოვა
როგორც მანჯგალაძემ დღეს გამართულ ბრიფინგზე აღნიშნა, ეს იყო მისი ბოლო შეხვედრა ჟურნალისტებთან ქვეყნის პირველი პირის პრესსპიკერის რანგში.
მანჯგალაძემ პრეზიდენტ მიხეილ სააკაშვილს, პრეზიდენტის პრეს-სამსახურის უფროსს ნათია ბანძელაძეს და პრეზიდენტის ადმინისტრაციის ყოფილ ხელმძღვანელს დავით ტყშელაშვილს მადლობა გადაუხადა.
ამასთან, მანჯგალაძემ იმედი გამოთქვა, რომ ავლაბრის რეზიდენცია ახალი პრეზიდენტის ადგილსამყოფელად დარჩება, რადგან აღნიშნული შენობა იძლევა იმის საშუალებას, რომ ახალმა პრეზიდენტმა ყველა სტუმარს ღირსეული მასპინძლობა გაუწიოს.
მანანა მანჯგალაძისვე თქმით, გასული პერიოდის განმავლობაში იგი მადლიერია ყველა ჟურნალისტთან თანამშრომლობთ და მათთან ერთად ნაყოფიერი მუშაობით.
"მინდა მადლობა გადაგიხადოთ ჩემს კოლეგებს ამ 4 წლიანი თანამშრომლობისთვის, მადლობა ყველა შეკითხვისთვის, ყველა შენიშვნისთვის და დახმარებისთვის. ბედნიერი ვარ, რომ ურთულესი 4 წლის მიუხედავად საოცრად პოლარიზებული პოლიტიკური ვითარების მიუხედავად ჩვენ მოვახერხეთ და ეს წლები გავიარეთ ყოველგვარი კონფლიქტის და დაპირისპირების გარეშე. მინდა ვთქვა და მადლობა გადავუხადო, პრეზიდენტის ადმინისტრაციის პრესსამსახურს, რომელიც დღე-ღამეში 48 საათი რომ იყოს, 48 საათი იმუშავებდა. მადლობა ჩემს კოლეგას, მეგობარს ნათია ბანძელაძეს. აქ არაადამიანური რესურსების მქონე ადამიანები მუშაობენ და ამ სიტყვას განსაკუთრებულად აღვნიშნავ, მუშაობენ ადამიანები ჯერ კიდევ ედუარდ შევარდნაძის პრეზიდენტობის დროიდან. მე დღეს არ მოვყვები სტატისტიკური მონაცემების ჩამოთვლას რამდენ ადამიანს დაეხმარნენ ისინი, რა მიმართულებით მუშაობდნენ, რამდენ ადამიანს მისცეს ცხოვრების კიდევ ერთი შანსი. მადლობა მათ ყველაფრისათვის. აქვე, როგორც მოქალქეს, როგორც ჟურნალისტს, როგორც ამ უწყების ყოფილ თანამშრომელს, მინდა დავამატო, რომ მინდა ეს სასახლე დარჩეს ისევ ქვეყნის პირველი პირის, საქართველოს პრეზიდენტის განკარგულებაში. ეს იმას ნიშნავს, რომ დარჩეს ხალხის სამსახურში, რადგან ჩემი ქვეყნის პრეზიდენტს ჰქონდეს საშუალება ღირსეულად დახვდეს და მიიღოს საპატიო და საპატივცემულო სტუმარი. აქ ყველაფერია იმისთვის, რომ იმუშაოთ საკუთარი ხალხისათვის, საკუთარი ქვეყნისათვის და ღირსეულად წარმოაჩინოთ თქვენი ქვეყნის სახე,"- განაცხადა მანანა მანჯგალაძემ.
