საქართველოს საგარეო საქმეთა მინისტრი მაია ფანჯიკიძე ორდღიანი სამუშაო ვიზიტით ქ. ბრიუსელს ეწვია, სადაც შეხვდა გაფართოებისა და ევროპული სამეზობლო პოლიტიკის საკითხებში ევროკომისარს შტეფან ფულეს და ევროკავშირის საგარეო ქმედებათა სამსახურის გენერალური მდივნის მოადგილეს ჰელგა შმიდს.
შეხვედრებზე ყურადღება უმთავრესად გამახვილდა საქართველო-ევროკავშირის თანამშრომლობის პრიორიტეტებზე, „აღმოსავლეთ პარტნიორობის" ვილნიუსის სამიტისთვის განსაზღვრულ მიზნებსა და სამიტის შემდგომ პერიოდში განსახორციელებელ გეგმებზე. მხარეებმა კიდევ ერთხელ დაადასტურეს მზაობა ვილნიუსის სამიტზე ასოცირების შესახებ შეთანხმების პარაფირებისათვის და მისი ხელმოწერისათვის 2014 წლის შემოდგომაზე.
შეხვედრებისას საუბარი შეეხო სავიზო რეჟიმის ლიბერალიზაციის სამოქმედო გეგმის შესრულების პროცესს და გამოითქვა მოლოდინი, რომ ვილნიუსის სამიტი დადებითად შეაფასებს საქართველოს პროგრესს ამ მიმართულებით. მხარეებმა გამოთქვეს იმედი, რომ ვილნიუსის სამიტის ფარგლებში ხელი მოეწერება ჩარჩო შეთანხმებას, რომელიც მისცემს საქართველოს საშუალებას ჩაერთოს ევროკავშირის კრიზისული სიტუაციების მართვის მისიებში და ასევე, წლის ბოლომდე გაფორმდება ევროკავშირის პროგრამებში მონაწილეობის შესახებ ოქმი, რაც კიდევ ერთი წინგადადგმული მნიშვნელოვანი ნაბიჯი იქნება ქვეყნის ევროკავშირთან შემდგომი დაახლოების კუთხით.
საგარეო საქმეთა სამინისტროს ინფორმაციით, ევროკავშირის მხარე კიდევ ერთხელ მიესალმა საქართველოში საპრეზიდენტო არჩევნების დემოკრატიულად და საერთაშორისო სტანდარტების დაცვით ჩატარებას, ასევე დადებითად შეაფასა ქვეყანაში რეფორმების მიმდინარეობა და ხაზი გაუსვა ამ პროცესში შემდგომი წინსვლის შენაჩუნების აუცილებლობას. შეხვედრებისას მნიშვნელოვანი ყურდღება დაეთმო საქართველოში უსაფრთხოების კუთხით არსებულ სიტუაციასა და ამ მიმართულებით ევროკავშირის როლის გააქტიურების შესაძლებლობებს.
აღნიშნული ვიზიტი განსაკუთრებით მნიშვნელოვანი იყო საქართველოსთვის ვილნიუსის სამიტამდე, როგორც კიდევ ერთი შესაძლებლობა ქართული მხარისათვის, წარმოეჩინა ევროინტერაციის მიმართულებით მიღწეული პროგრესი და დაედასტურებინა მზაობა სამიტისთვის დასახული მიზნების განხორციელებისთვის.
