რუსეთის საგარეო საქმეთა მინისტრის მოადგილე გრიგორი კარასინი აცხადებს, რომ ჟენევის მოლაპარაკებებზე უსაფრთხოების ჯგუფში მოლაპარაკებათა მთავარი საკითხი თავდაუსხმელობის ხელშეკრულების გაფორმება რჩება.
„ამ თემის სხვა თემებით ჩანაცვლება არ გამოვა",_ აცხადებს კარასინი და აღნიშნავს, რომ იმის გათვალისწინებით, რომ საქართველოში საპრეზიდენტო არჩევნები ჩატარდა და ახალი პრეზიდენტია არჩეული რუსულ მხარეს გარკვეული იმედები ჰქონდა, რომ ქართული დელეგაციის პოზიცია ჟენევაში უფრო „მოქნილი და კონსტრუქციული იქნებოდა".
„სამწუხაროდ ჯერ ეს იმედები არ მართლდება. როგორც ჩანს თბილისს ჯერ დრო სჭირდება იმისათვის, რომ საბოლოოდ გაიაზროს მეზობელ სახელმწიფოებთან პრობლემების დარეგულირების მშვიდობიანი გზის უალტერნატივობა. ამ მიმართულებით შემდეგ რაუნდზე სერიოზულ წინ წაწევას ველით, რომელიც დეკემბერში უნდა გაიმართოს",_ აცხადებს კარასინი.
მასალის გამოყენების პირობები
