ახლადარჩეული პრეზიდენტის, გიორგი მარგველაშვილის ინაუგურაციაზე დამსწრე სხვადასხვა ქვეყნების მაღალი რანგის პირების ნაწილის ვინაობა ცნობილია.
საგარეო საქმეთა მინისტრის და ინაუგურაცის მოსამზადებელი სამუშაო ჯგუფის წარმომადგენლის მაია ფანჯიკიძის განცხადებით, მაღალი რანგის სტუმრებს შორის ევროკავშირის თავმჯდომარე ქვეყნის პრეზიდენტი, სხვადასხვა ქვეყნების მინისტრები და მინისტრის მოადგილეები არიან.
ფანჯიკიძის თქმით, არის ისეთი ქვეყნებიც, რომლებიც ინაუგურაციაზე ელჩების დონეზე იქნებიან წარმოდგენილნი და ასეთები ძირითადად ის ქვეყნები არიან, რომლებსაც საქართველოში ოფიციალური დიპლომტიური წარმომადგენლობა და საელჩო არ აქვთ.
"სტუმართა სია ჯერჯერობით ბოლომდე არ არის ცნობილი, მაგრამ რასაკვირველია მათი დიდი ნაწილი უკვე ვიცით. მაგალითად ვიცით, რომ გვესტუმრება ლიტვის პრეზიდენტი. ლიტვა, როგორც ევროკავშირის თავმჯდომარე ქვეყანა, ამ შემთხვევაში თავისი პრეზიდენტის ჩამოსვლით სწორედ იმ მნიშვნელობას უსვამს ხაზს, რაც საქართველოს აქვს ევროკავშირისთვის. გარდა ამისა, ვიცით, რომ იქნება ავსტრიის პარლამენტის თავმჯდომარე, ვიცით ყაზახეთის ვიცე-პრემიერის სტუმრობა, ჩამოვა 7 მინისტრი, ჩამოვა ძალიან ბევრი მინისტრის მოადგილე, მაგრამ არის ქვეყნებიც, რომლებიც წარმოდგენილები იქნებიან ელჩების დონეზე. ეს ძირითადად ის ქვეყნებია, რომლებსაც საელჩოები არ აქვთ საქართველოში და ჩამოვლენ ის ელჩები, რომლებიც სხვა ქვეყნებიდან ფარავენ საქართველოს,"- განაცხადა მაია ფანჯიკიძემ.
