"ქართული ოცნება - დემოკრატიული საქართველოს" პოლიტიკური მდივნის არმაზ ახვლედიანის განცხადებით, იგი ისურვებდა, რომ 17 ნოემბერს, ქვეყნის ახალი პრეზიდენტის, გიორგი მარგველაშვილის ინაუგურაციას ედუარდ შევარდნაძე და მიხეილ სააკაშვილიც დაესწრონ.
"მე ვისურვებდი, რომ დაესწროს ორივე პრეზიდენტი, შევარდნაძეც და სააკაშვილიც. ინაუგურაცია ჩატარდება მშვიდად, არაპომპეზურად, მაგრამ ისე, რომ დასამახსოვრებელი არაერთი სტუმარი იქნება. დიდი მოვლენაა პრეზიდენტის ინაუგურაცია,"- განაცხადა არმაზ ახვლედიანმა.
პრეზიდენტის ადმინისტრაციის უფროსის ანდრო ბარნოვის განცხადებით, მიხეილ სააკაშვილს გიორგი მარგველაშვილის ინაუგურაციაზე მოსაწვევი ამ დრომდე არ მიუღია.
ბარნოვის თქმით, პრეზიდენტმა მოსაწვევიც რომ მიიღოს, ინაუგურაციაზე დასწრების გადაწყვეტილებას რიგი კრიტერიუმების დაკმაყოფილებით მიიღებს.
ანდრო ბარნოვი განმარტავს, რომ თუ პრეზიდენტს ექნება სარწმუნო სურათი, რომ ქვეყნის დამოუკიდებლობა განმტკიცდება მომავალში და პირიქით არ წავა პროცესები და არ დაინგრევა ყველაფერი, რაც შექმნილა, მაშინ სავარაუდოდ სააკაშვილი მივა ინაუგურაციაზე.
არჩეული პრეზიდენტის გიორგი მარგველაშვილის ინაუგურაცია 17 ნოემბერს თბილისში, პარლამენტის ძველი შენობის შიდა ეზოში ჩატარდება.
