პრეზიდენტის ადმინისტრაციის უფროსის ანდრო ბარნოვის განცხადებით, მიხეილ სააკაშვილს გიორგი მარგველაშვილის ინაუგურაციაზე მოსაწვევი ამ დრომდე არ მიუღია.
ბარნოვის თქმით, პრეზიდენტმა მოსაწვევიც რომ მიიღოს, ინაუგურაციაზე დასწრების გადაწყვეტილებას რიგი კრიტერიუმების დაკმაყოფილებით მიიღებს.
ანდრო ბარნოვი განმარტავს, რომ თუ პრეზიდენტს ექნება სარწმუნო სურათი, რომ ქვეყნის დამოუკიდებლობა განმტკიცდება მომავალში და პირიქით არ წავა პროცესები და არ დაინგრევა ყველაფერი, რაც შექმნილა, მაშინ სავარაუდოდ სააკაშვილი მივა ინაუგურაციაზე.
"თუ ამის სურათი არ შეიქმნება, მაშინ არ არის გამორიცხული, რომ მან ამაზე უარი თქვას. მას მოსაწვევები არ მიუღია და ეს მანიშნებელია რაღაცის. პრინციპში ამას მინიშნება არ უნდა არაფრის, დღევანდელი ხელისუფლების ძალიან აქტიური წევრები და პირველი პირები აცხადებენ, რომ მათ არ უნდათ,"- განაცხადა ანდრო ბარნოვმა.
არჩეული პრეზიდენტის გიორგი მარგველაშვილის ინაუგურაცია 17 ნოემბერს თბილისში, პარლამენტის ძველი შენობის შიდა ეზოში ჩატარდება.
