რეინტეგრაციის საკითხებში სახელმწიფო მინისტრის პაატა ზაქარეიშვილის განცხადებით, სოჭის ოლიმპიადაზე საქართველოს პოლიტიკური ხელმძღვანელობის წასვლის გადაწყვეტილება მომავალში მიიღება და ეს ოლიმპიადამდე დარჩენილ პერიოდში განვითარებულ მოვლენებზე იქნება დამოკიდებული.
"მარგველაშვილთან დაკავშირებით ჩემი მონაწილეობით კონსულტაციები არ ყოფილა, მაგრამ როდესაც ადრე საუბარი იყო მიგვეღო თუ არ უნდა მიგვეღო მონაწილეობა სოჭის ოლიმპიადაში, ვგულისხმობ მაისს, როდესაც საქართველოს ოლიმპიურმა კომიტეტმა მიიღო გადაწყვეტილება მონაწილეობა მიიღოს სოჭის ოლიმპიადაში, მაშინ ერთ-ერთი საკითხი იყო რამდენად შეიძლებოდა სოჭის ოლიმპიადაში მონაწილეობა მიეღო საქართველოს პოლიტიკურ ხელმძღვანელობას და მაშინ ითქვა, რომ ეს არის მომავლის საქმე. მომავალში, ანუ სოჭის ოლიმპიადისთვის უფრო ახლო პერიოდში იქნება მიღებული გადაწყვეტილება იმისდა მიხედვით, თუ რა მდგომარეობა იქნება რუსეთსა და საქართველოს სორის ურთიერთობებიდან გამომდინარე,"- განაცხადა პაატა ზაქარეიშვილმა.
ცნობისთვის, არჩეულმა პრეზიდენტმა გიორგი მარგველაშვილმა რუსული ტელეკომპანია "ORT"-სთვის მიცემულ ინტერვიუში რუსეთ-საქართველოს ურთიერთობებზე, სოჭის ოლიმპიადაზე და აღნიშნულ ოპლიმპიადაზე მისი ვიზიტის შესაძლებლობაზე ისაუბრა.
ჟურნალისტის კითხვაზე - ლიდერები ხშირად ჩამოდიან თავიანთი გუნდების მხარდასაჭერად, ან ოლიმპიადის დახურვაზე და გახსნაზე. თქვენ აპირებთ ჩამოსვლას?, მარგველაშვილმა უპასუხა, რომ ამ საკითხს გუნდში განიხილავს და შესაბამის გადაწყვეტლებას მხოლოდ ამის შემდეგ მიიღებს.
