საქართველოს პრეზიდენტმა მიხეილ სააკაშვილმა 2007 წლის 7 ნოემბრის მოვლენებზე კომენტარი გააკეთა.
ქვეყნის პირველი პირის თქმით, ყველანაირი შეზღუდვა ტელევიზიებისა, ექსცესი და ძალადობა ქუჩისა თუ სახელმწიფოს მხრიდან არის ცუდი და იგი ამას ყოველთვის დიდი წუხილით გაიხსენებს.
"ყველანაირი შეზღუდვა ტელევიზიებისა, სწორი არ არის და მე ამას ვიზიარებ. რაც შეეხება მაშინდელ "იმედის" მფლობელს, ის რუსი ოლიგარქი იყო. ყველანაირი ექსცესი და ძალადობა ქუჩისა თუ სახელმწიფოს მხრიდან არის ცუდი და ყოველთვის გავიხსენებ მე ამას დიდი წუხილით, მაგრამ ერთი რაღაცა უნდა ვიცოდეთ, რომ ასეთი რამ ყველა განვითარებულ სახელმწიფოში ხდება", - განაცხადა მიხეილ სააკაშვილმა.
შეგახსენებთ, რომ 2007 წლის 7 ნოემბერს ანტისახელისუფლებო აქცია ძალის გამოყენებით დაიშალა. 6 წლის წინ განვითარებული მოვლენების შედეგად ათობით ადამიანი მძიმედ დაშავდა, მათ შორის იყვნენ ჟურნალისტებიც. ამასთან, 2007 წლის 7 ნოემბერს ბადრი პატარკაციშვილის კუთვნილ ტელეკომპანია "იმედში" სპეციალური დანიშნულების რაზმი შეიჭრა და არხის მაუწყებლობის იძულებით გაჩერება მოხდა. დღის ბოლოს, საქართველოს იმდროინდელმა პრეზიდენტმა მიხეილ სააკაშვილმა ქვეყანაში საგანგებო მდგომარეობა გამოაცხადა.