ექსპერტი მამუკა არეშიძე მიიჩნევს, რომ მთავრი პროკურორის პოსტზე მუშაობისას არჩილ კბილაშვილის ერთადერთი პრინციპული გადაწყვეტილება ლადო ბედუკაძის საქმეზე მიღებული გადაწყვეტილება იყო, რადგან სხვა შემთხვევებში მას მთელი 1 წლის განმავლობაში გარკვეულ ჩარჩოებში მოქცევით უწევდა საქმიანობის წარმართვა.
"ჯი-ეიჩ-ენის" კითხვაზე - გახდა თუ არა კბილაშვილის გადადგომის მიზეზი ბედუკაძის საქმეზე მისი და ღარიბაშვილის განსხვავებული პოზიციები, არეშიძე პასუხობს, რომ მთავარი პროკურორი თანამდებობიდან მხოლოდ აღნიშნული არგუმენტის გამო არ გადადგებოდა, თუმცა შესაძლოა, ამ გადაწყვეტილებასაც ჰქონდეს გარკვეული გავლენა.
"ამ კონკრეტულ შემთხვევას ვერ დავაბრალებ კბილაშვილის გადადგომას, მაგრამ შესაზლებელია, რომ მართლაც სხვა ხედვები აქვს ახალ პრემიერს. არ გამიკვირდება ეს ამბავი. მერე რა, რომ ისინი ერთი გუნდის წევრები იყვნენ, ყველაფერი ხდება ხოლმე. რასაკვირველია ამ საქმეში ჩართული იქნებოდა ივანიშვილიც, მისი მონაწილეობის გარეშე არ მოხდებოდა ეს ამბავი,"- განაცხადა მამუკა არეშიძემ.
შეგახსენებთ, რომ არჩილ კბილაშვილის გადაწყვეტილებით, პატიმართა წამებასა და არაადამიანურ მოპყრობაში ბრალდებული ვლადიმერ ბედუკაძე ბრალდებისგან სრულად გათავისუფლდა. მთავარი პროკურორის აღნიშნული გადაწყვეტილების კომენტირებისას შს მინისტრმა ირაკლი ღარიბაშვილმა განაცხადა, რომ თავად რომ ყოფილიყო კბილაშვილის ადგილზე, სხვა გადაწყვეტილებას მიიღებდა.
