ამერიკის სავაჭრო პალატა საქართველოში გიორგი მარგველაშვილს 27 ოქტომბრის საპრეზიდენტო არჩევნებში გამარჯვებას და იმ მხარდაჭერას ულოცავს, რომელიც მას საქართველოს მოსახლეობამ გამოუცხადა.
ამერიკის სავაჭრო პალატაში იმედი აქვთ, რომ გიორგი მარგველაშვილის პრეზიდენტობის პერიოდში სახელმწიფოსა და ბიზნესს შორის პარტნიორობა უფრო გაღრმავდება.
„ეს არჩევნები იყო კიდევ ერთი მნიშვნელოვნად წინ გადადგმული ნაბიჯი საქართველოში მყარი დემოკრატიის შექმნის მიმართულებით, რაც გასულ წელს თავისუფალი და დემოკრატიული არჩევნების გზით ხელისუფლების ცვლას მოჰყვა. 28 ოქტომბერს გამოქვეყნებული საერთაშორისო სადამკვირვებლო მისიის განცხადებით „27 ოქტომბრის საპრეზიდენტო არჩევნები ეფექტურად იმართებოდა და გამჭვირვალე, მშვიდ და კონსტრუქციულ გარემოში მიმდინარეობდა," რაც უდიდესი წარმატებაა და ჩვენ ვულოცავთ ამას საქართველოს მთავრობას, ოპოზიციას და მთელ ქართულ საზოგადოებას.
ჩვენ ასევე მივესალმებით პრეზიდენტ მიხეილ სააკაშვილის მიღწევებს, რომელიც
პრეზიდენტობიდან წასასვლელად ემზადება. მისი მმართველობის პერიოდში იყო ბევრი გამოწვევა, მაგრამ იყო ძალიან დიდი წინსვლაც, რისთვისაც ქართველ ხალხს შეუძლია მადლიერი იყოს. მომავლის საქართველო ამ მემკვიდრეობის ბევრ კარგ ასპექტს შეიძლება რომ დაეფუძნოს"- ნათქვამია პალატის მიერ გავრცელებულ განცხადებაში.
შეგახსენებთ, რომ ამერიკის სავაჭრო პალატა არის ყველაზე დიდი ბიზნეს-ასოციაცია საქართველოში, რომელიც 150-ზე მეტ კომპანიას აერიანებს ბევრი სხვადასხვა სექტორიდან. იგი 1998 წელს დაარსდა და მიზნად ისახავს ხელი შეუწყოს ამერიკასა და საქართველოს შორის ურთიერთობებს და ბიზნეს-კლიმატის გაუმჯობესებას საქართველოში.
