ევროკომისიამ უკრაინას 2,86 მილიარდი ევრო გამოუყო 90 მილიარდი ევროს ოდენობის კრედიტის თავდაცვის კომპონენტის ფარგლებში. თანხა შეიარაღების შესაძენად და ფრონტის გადაუდებელი საჭიროებების დასაკმაყოფილებლად არის განკუთვნილი.

ამის შესახებ ნათქვამია ევროკომისიის ოფიციალურ განცხადებაში.

გამოყოფილი თანხით უკრაინა შეიძენს უპილოტო საფრენ აპარატებს, საჰაერო თავდაცვის საშუალებებს, რაკეტებს, რადიოლოკაციურ სადგურებს, რადიოელექტრონული ბრძოლის სისტემებსა და საბრძოლო მასალას.

„მაშინ, როდესაც რუსეთი ფრონტის ხაზზე წინსვლას ვერ ახერხებს, ის საჰაერო თავდასხმებს კვლავ აძლიერებს და სასტიკად ურტყამს უკრაინის სამოქალაქო მოსახლეობასა და ინფრასტრუქტურას. ევროპის ურყევი მხარდაჭერა ახლა იმაზე მნიშვნელოვანია, ვიდრე ოდესმე, რათა უკრაინას საჰაერო სივრცის დაცვასა და ადამიანების სიცოცხლის გადარჩენაში დავეხმაროთ“, - განაცხადა ევროკომისიის პრეზიდენტმა ურსულა ფონ დერ ლაიენმა.

ევროკომისიის განმარტებით, უკრაინა რუსეთის სრულმასშტაბიანი შეჭრის დაწყების შემდეგ მეოთხე ზამთრისთვის ემზადება. თავდაცვითი აღჭურვილობის დროული მიწოდება უკრაინის შეიარაღებულ ძალებს საშუალებას მისცემს, დაიცვან სამოქალაქო მოსახლეობა და ქალაქები რუსეთის თავდასხმებისგან.

2022 წლიდან ევროკავშირმა და მისმა წევრმა ქვეყნებმა უკრაინას ჯამში 231,5 მილიარდი ევროს ოდენობის დახმარება გაუწიეს. ამ თანხაში შედის 3,8 მილიარდი ევრო, რომელიც გაყინული რუსული აქტივებიდან მიღებული შემოსავლების ხარჯზე გამოიყო.