საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ, მსოფლიო ბანკის წარმომადგენელთან საქართველოში ჰენრი კერალთან შეხვედრა გამართა.
შეხვედრის ძირითადი თემა, დევნილთათვის ბინათმშენებლობის გასაგრძელებლად მცირეპროცენტიანი სესხის გამოყოფა და დევნილთათვის შემოსავლის წყაროს მომტანი პროექტები იყო.
„ჩვენ განვიხილეთ დევნილთათვის მსხვილმასშტაბიანი ფინანსური დახმარების საკითხები, როგორც ჰენრი კერალმა ბრძანა, მომავალი წლიდან იგეგმება 300 მილიონი დოლარის დახმარება საქართველოსათვის, საიდანაც შესაძლებელია, რომ მნიშვნელოვანი წილი იქნეს დევნილთა განსახლების საკითხებისათვის მიმართული. ასევე, დევნილთა შემოსავლის წყაროების პროგრამა, სადაც შედარებით უფრო მცირე, მაგრამ რამდენიმე მილიონიანი გრანტი შეიძლება იქნეს გამოყოფილი იმისათვის, რომ დევნილთა შემოსავლის წყაროების პროექტები დაფინანსდეს სამინისტროსთან შექმნილი სსიპ-ის ფარგლებში, რომელსაც ექსპერტების დონეზე კონსულტირებას და დახმარებას გაუწევენ მსოფლიო ბანკის ექსპერტები" - განაცხადა მინისტრმა.
მინისტრმა, მსოფლიო ბანკის წარმომადგენელს დევნილთა შესახებ არსებული მდგომარეობა გააცნო და აღნიშნა, რომ მათ ძირითადად განსახლების პრობლემა აწუხებთ. დავით დარახველიძემ, ასევე იმ საკითხების შესახებ ისაუბრა, რომლებიც საქართველოს მთავრობამ დღევანდელ სხდომაზე განიხილა.
ჰენრი კერალის განცხადებით, მსოფლიო ბანკი საქართველოს 300 მილიონი დოლარით დაეხმარება. ამ თანხიდან დაახლოებით 30 მილიონი დოლარი დევნილთა დასახმარებლად გამოიყოფა, საიდანაც ნაწილი დევნილთათვის შემოსავლის წყაროს მომტანი პროექტების განხორციელებას მოხმარდება. აღნიშნულ პროექტს სამინისტროში შექმნილი საჯარო სამართლის იურიდიული პირი (სსიპ) განახორციელებს. სსიპ-ს ფუნქციონირებაში მსოფლიო ბანკიდან გამოყოფილი ექსპერტები დაეხმარებიან.
მინისტრი, მსოფლიო ბანკის ახლო აღმოსავლეთისა და ჩრდილოეთ აფრიკის რეგიონის ოფისის დირექტორს ჟერარ ბიამს ჟენევაში ვიზიტის დროს შეხვდა, რომელმაც მინისტრს აღუთქვა, რომ შეხვედრის შედეგებისა და სამინისტროს საჭიროებების შესახებ ინფორმაციას სრულად მიაწვდიდა მსოფლიო ბანკის შესაბამის განყოფილებას.