პარლამენტში „საქართველოს დედაქალაქის - თბილისის შესახებ" კანონში ცვლილებების პროექტი დარეგისტრირდა, რომლის ავტორები ირეკლე ტრიპოლსკი და გია ჟორჟოლიანი არიან. თბილისის საკრებულოს კომპეტენციას მერის პირველი მოადგილის და მოადგილეების, საქალაქო სამსახურების უფროსების, მერიის ადმინისტრაციის უფროსისა და თბილისის რაიონების გამგებლების თანამდებობაზე დანიშვნაზე თანხმობის მიცემა, ასევე, მათთვის უნდობლობის გამოცხადება ემატება.
კანონპროექტის მიხედვით, თბილისის საკრებულო შესაბამისი კანდიდატურის დანიშვნის საკითხს მათი წარმოდგენიდან ერთი კვირის ვადაში განიხილავს. საკრებულოს მიერ თბილისის მერის წარდგენილი კანდიდატების დაწუნების შემთხვევაში მერი 1 კვირის ვადაში წარადგენს იმავე ან სხვა კანდიდატურას. თუ საკრებულო კვლავ არ მისცემს თანხმობას, საკრებულოს წევრთა არანაკლებ 1/3 წამოაყენებს ახალ კანდიდატურას, რომელსაც საკრებულო განიხილავს. თუ საკრებულო ვერ დაამტკიცებს თანამდებობაზე კანდიდატურას, თბილისის მერი თანამდებობაზე ნიშნავს მისთვის სასურველ კანდიდატურას.
"მერის მაღალი ლეგიტიმაციის მიუხედავად, რასაც მას პირდაპირი არჩევნებით მიღებული მანდატი ანიჭებს, აუცილებელია საკრებულოს, რომელიც ასევე პრიდაპირი წესითაა არჩეული ადგილობრივი საზოგადოების მიერ, მონაწილეობა ქალაქ თბილისის მერიის შესაბამისი თანამდებობის პირების დანიშვნაში. შესაბამისად, დედაქალაქის საკრებულოს საქმიანობის ეფექტურად განსახორციელებლად და აღმასრულებელი ორგანოების მეტი გამჭვირვალობის უზრუნველსაყოფად საჭიროა საკრებულოს როლის გაზრდა მნიშვნელოვანი საკადრო გადაწყვეტილებების მიღებაში მონაწილეობის თვალსაზრისით," - წერია კანონპროექტის განმარტებით ბარათში.
