მიმდინარე წლის 30 ოქტომბერს, საქართველოს ფინანსთა მინისტრი ნოდარ ხადური საქართველოში ესტონეთისა და ფინეთის საგანგებო და სრულუფლებიან ელჩებს პრიიტ ტურკს (Priit Turk) და კრისტერ მიშელსონს (Christer Mishelsson) შეხვდა. შეხვედრაზე ელჩებმა ქვეყანაში გამართული საპრეზიდენტო არჩევნები შეაფასეს და მმართველ გუნდს კოალიციის კანდიდატის, გიორგი მარგველაშვილის გამარჯვება მიულოცეს.
საუბარი ასევე შეეხო ევროკავშირის დაძმობილების, ე.წ. ტვინინგის პროექტის ფარგლებში ესტონეთის, ფინეთისა და საქართველოს თანამშრომლობის საკითხებს.
„საუბარი დაიწყო არჩევნების შეფასებით. ელჩებმა მოგვილოცეს არჩევნების მშვიდობიანად, წარმატებულად, დემოკრატიულად და ევროპული სტანდარტებით ჩატარება. მმართველ გუნდს მოგვილოცეს ის, რომ კოალიციის კანდიდატმა, გიორგი მარგველაშვილმა დიდი დამაჯერებლობით გაიმარჯვა არჩევნებში. გარდა ამისა, ვისაუბრეთ საქართველოს, ესტონეთსა და ფინეთს შორის თანამშრომლობის საკითხებზე. კერძოდ, ევროკავშირის დაძმობილების, ე.წ. ტვინინგის პროგრამებზე, რომლებსაც ფინეთი და ესტონეთი საქართველოს ფინანსთა სამინისტროს აკადემიასთან და ფინანსთა სამინისტროს შემოსავლების სამსახურთან ერთად განახორციელებენ. ჩვენთვის მნიშვნელოვანია ის გამოცდილება, რომელიც ამ ორმა ქვეყანამ გაიარა, განსაკუთრებით, საგადასახადო სფეროში. შევთანხმდით, რომ ამ მიმართულებით ბევრი რამ გვაქვს გასაკეთებელი, რათა ჩამოვაყალიბოთ ევროპული სტანდარტების საგადასახადო სისტემა," - განაცხადა ფინანსთა მინისტრმა ნოდარ ხადურმა.
