საქართველოს ეკონომიკისა და მდგრადი განვითარების სამინისტროში სამოქალაქო ავიაციის საერთაშორისო ორგანიზაციის (ICAO) სამოქალაქო ავიაციის სისტემის ყოვლისმომცველი აუდიტის დასკვნითი შეხვედრა გაიმართა.
საქართველოს მხრიდან შეხვედრას ესწრებოდნენ საქართველოს ეკონომიკისა და მდგრადი განვითარების მინისტრის მოადგილე ნათია მიქელაძე, სსიპ სამოქალაქო ავიაციის სააგენტოს დირექტორი გურამ ჯალაღონია, აგრეთვე სამინისტროსა და სააგენტოს სხვა წარმომადგენლები.
2013 წელს ICAO-ს აუდიტი 21-29 ოქტომბრის ჩათვლით მიმდინარეობდა და მის მიზანს საქართველოს საავიაციო სისტემის შემოწმება წარმოადგენდა. სამოქალაქო ავიაციის სისტემის ყოვლისმომცველი აუდიტის ფარგლებში შემოწმდა სსიპ „სამოქალაქო ავიაციის სააგენტო", „საავიაციო შემთხვევებისა და ინციდენტების მოკვლევის ბიურო" და საავიაციო ინდუსტრია.
აღსანიშნავია, რომ სამოქალაქო ავიაციის საერთაშორისო ორგანიზაციის ყოვლისმომცველი აუდიტი საქართველოში ბოლოს 2007 წელს ჩატარდა.
ICAO-ს ექსპერტებმა წარმოადგინეს შემოწმების წინასწარი შედეგები. ხაზი გაესვა იმ დიდ პროგრესს, რომელსაც საქართველომ ბოლო წლების განმავლობაში მიაღწია. აღსანიშნავია ის ფაქტი, რომ წლევანდელი აუდიტის შედეგები, 2007 წელს ჩატარებული აუდიტის შედეგებთან შედარებით, 2-ჯერ გაუმჯობესდა.
საქართველო ICAO-ს საბოლოო ანგარიშს 2014 წლის დასაწყისში ელოდება, რის საფუძველზეც განაგრძობს აღმოჩენილი ნაკლოვანებების აღმოფხვრას და რეკომენდაციების გათვალისწინებას.