სრულიად საქართველოს კათოლიკოს პატრიარქმა, მცხეთა-თბილისის მთავარეპისკოპოსმა, ბიჭვინთისა და ცხუმ-აფხაზეთს მიტროპოლიტმა უწმინდესმა და უნეტარესმა ილია მეორემ არჩევნებში მონაწილეობის შემდეგ სვეტიცხოვლის ტაძარში შეკრებილ მრევლს მიმართა და ხმის მიცემის პროცესში მონაწილეობისკენ მოუწოდა.
"დღეს არის არჩევნები პრეზიდენტისა. ვინც არ ყოფილა თავის არჩევნების პუნქტში, აუცილებლად ყველანი უნდა მივიდეთ და არჩიოთ ის, ვისზეც ფიქრობთ, რომ გამოადგება საქართველოს. ჩვენ ვცხოვრობთ ძალიან ცუდ და რთულ დროს, იმ დროს, როცა ფასეულობათა დევალვაცია ხდება, როცა ის ფასეულობა, რომლისთვისაც ათასობით და მრავალი ადამიანი შეეწირა, ეს არის მამული, ეს არის სარწმუნოება, ეს არის სამშობლო, ეს არის ჩვენი სულიერობა და ჩვენი სარწმუნოება,"- განაცხადა ილია მეორემ.
სრულიად საქართველოს კათოლიკოს პატრიარქმა ხმა კრწანისის მეოთხე ოლქის მეოთხე საარჩევნო უბანზე მისცა.
ილია მეორემ საარჩევნო უბანი უკომენტაროდ დატოვა. პატრიარქი ამომრჩეველთა სიაში 1 173-ე ნომრით იყო რეგისტრირებული.
