ზემო აფხაზეთისთვის სახელწოდების შეცვლის თაობაზე არასწორი ინფორმაცია გავრცელდა. როგორც "ჯი-ეიჩ-ენს" აფხაზეთის ავტონომიური რესპუბლიკის მთავრობის საზოგადოებასთან ურთიერთობის სამსახურის უფროსმა ნინო კვარაცხელიამ განუცხადა, უწყების თავმჯდომარის მოვალეობის შემსულებელმა ვახტანგ ყოლბაიამ ზემო აფხაზეთში აფხაზეთის ავტონომიური რესპუბლიკის მთავრობის წარმომადგენლობის სახელწოდების შეცვლის საკითხი დააყენა დღის წესრიგში, რაც შეეხება მთლიანად რეგიონისთვის სახელწოდების შეცვლის საკითხს, აღნიშნული ინფორმაცია სიმართლეს არ შეესაბამება.
მისი თქმით, ინიცირებულია ამჟამად არსებული უწყება - ზემო აფხაზეთის საკითხებში აფხაზეთის ავტონომიური რესპუბლიკის მინისტრის აპარატი გაუქმდეს და ჩამოყალიბდეს აფხაზეთის ავტონომიური რესპუბლიკის მთავრობის წარმომადგენლობა ზემო აფხაზეთის მხარეში.
ამასთან, აფხაზეთის მთავრობის პრეს-სამსახურის უფროსის ინფორმაციით, ჯერ-ჯერობით აღნიშნული საკითხი მუშა პროცესშია და ამ ეტაპზე არც ახლადშექმნილი უწყების სტრუქტურული მოწყობის და არც შესაძლო რეორგანიზაციის დეტალებია ცნობილი.
როგორც კვარაცხელიამ "ჯი-ეჩ-ენთან" საუბრისას განმარტა, ამჟამად აფხაზეთის ავტონომიური რეპუბლიკის მთავრობას წარმომადგენლობები ქვეყნის სამ რეგიონში - იმერეთში, სამეგრელო-ზემო სვანეთსა და აღმოსავლეთ საქართველოში აქვს, უახლოეს მომავალში კი, აღნიშნულ ჩამონათვალს ზემო აფხაზეთის მხარეში აფხაზეთის ავტონომიური რესპუბლიკის მთავრობის წარმომადგენლობა დაემატება.
