საპარლამენტო უმრავლესობის ლიდერი, კოალიცია "ქართული ოცნების" საპრეზიდენტო კანდიდატის გიორგი მარგველაშვილის წინასაარჩევნო შტაბის ხელმძღვანელი დავით საგანელიძე მეგის ქარდავასთან თანამშრომლობის თაობაზე მის მიმართ წაყენებულ ბრალდებებს პასუხობს .
საგანელიძის განცხადებით, გავრცელდა ინფორმაცია, რომ თითქოს მეგის ქარდავამ მისი გადაბირება მოახდინა, რის შესახებაც ოპერატიული ტექნიკის გამოყენებით ვიდეოფიქსაციაც არსებობს, თუმცა დეპუტატის თქმით, მსგავსი შეხვედრა არ შემდგარა, აღნიშნული ფაქტი არის მოგონილი, გამოქვეყნებული მასალა არის თავიდან ბოლომდე შეთითხნილი და შესაბამისად არარსებულ შეხვედრაზე ვიდეოფიქსაციაც ვერ მოხდებოდა.
"მსურს გამოვეხმაურო მ/წლის 8 ოქტომბერს გაზეთ „ქრონიკა +"-ში გამოქვეყნებულ სტატიას, რომლის თანახმადაც საქართველოს თავდაცვის სამინისტროს შეიარაღებული ძალების გაერთიანებული შტაბის სამხედრო პოლიციის დეპარტამენტთან თანამშრომლობის შესახებ თანხმობა „მქონია" გაცხადებული. ეს კონკრეტული მედია საშუალება ნამდვილად არ იმსახურებს ჩემგან და მითუმეტეს საზოგადოებისგან ყურადღების მიპყრობას, მაგრამ მე როგორც ამ ქვეყნის მოქალაქეს და მითუმეტეს საქართველოს პარლამენტის წევრს არ მაქვს უფლება თუნდაც ერთ ამომრჩეველს დავუტოვო ამ მასალის რეალობის ეჭვი და მეორეს მხრივ თაღლითურ ჯგუფს დავუტოვო შანსი ქვეყანაში გააგრძელონ მიზანმიმართული ცილისმწამებლური კამპანია. ზემოაღნიშნული არის, სხვა არაფერი, თუ არა დაინტერესებული, თაღლითური ჯგუფის მიერ ფალსიფიცირებული დოკუმენტის შექმნა და გაზეთის ე.წ. ჟურნალისტის მიერ საზოგადოების განზრახ შეცდომაში შეყვანა (ვთვლი, რომ მისი ჟურნალისტად მოხსენიება, ჟურნალისტთა კორპუსის შეურაცხყოფაა),"- განაცხადა დავით საგანელიძემ.
საპარლამენტო უმრავლესობის ლიდერის თქმით, ყოველივე ზემოაღნიშნულიდან გამომდინარე საჩივრით მიმართავს მთავარ პროკურატურას, რათა დეტალურად იქნას გამოძიებული, თუ ვის მიერ და რა მიზნით არის შექმნილი ეს ყალბი დოკუმენტი.
"ვაცხადებ მზადყოფნას ხელი შევუწყო გამოძიებას და მიუხედავად იმისა, რომ როგორც საქართველოს პარლამენტის წევრი, ვსარგებლობ იმუნიტეტით, მონაწილეობა მივიღო ნებისმიერ საგამოძიებო მოქმედებებში. ასევე მოვითხოვ, აღნიშნული გამოძიების პროცესის გასაჯაროებას და შესაბამისი უწყების მხრიდან დამნაშავეთა გამოვლენას და მათი კანონის მთელი სიმკაცრით დასჯას. ასევე ცრუ მასალის გამოქვეყნების გამო, გაზეთ „ქრონიკა +"-ის წინააღმდეგ, სამოქალაქო სარჩელით მივმართავ სასამართლოს, რომლითაც გაზეთის რედაქციისაგან მოვითხოვ ცილისწამების აღიარებას საინფორმაციო საშუალებებით, საჯაროდ ბოდიშის მოხდას და ვინაიდან არ არსებობს თანხა, რომლითაც შემიძლია შევაფასო ჩემი ღირსებისა და პატივის შელახვის მცდელობა, მორალური ზიანის სიმბოლურ თანხობრივ ანაზღაურებას - გაზეთის ტირაჟის გაასმაგებული ოდენობით,"- აღნიშნავს დავით საგანელიძე.
