საქართველოს პრემიერ-მინისტრი ბიძინა ივანიშვილი "ქართული ოცნების" საპრეზიდენტო კანდიდატ გიორგი მარგველაშვილთან ერთად დღეს სამეგრელოს სტუმრობდა.
პრემიერის პრესსამსახურის ინფორმაციით, ბიძინა ივანიშვილმა ზუგდიდის ცენტრში შეკრებილ მოსახლეობას სიტყვით მიმართა და 27 ოქტომბერს არჩევნებში მისვლისკენ მოუწოდა.
"ჩვენი შეხვედრა დიდი ილიას სიტყვებით მინდა დავიწყო: „სამეგრელოში მოველ და საქართველო ვნახე - დიდი საქართველო!" მოგესალმებით, ჩემო მეგრელებო! მე არსად არ მივდივარ! ორწლიანი ციკლი დავასრულე და გიტოვებთ საუკეთესო მთავრობას! ახლა გადავდივართ 20 წლიან ციკლზე და სანამ საუკეთესო ქვეყანას არ მივიღებთ, მე არსად წასვლას არ ვაპირებ! გპირდებით ყველა მომდევნო წელი იქნება წინა წელზე უკეთესი, 4 წლის თავზე კი ჩვენ ვიცხოვრებთ ჭეშმარიტად ევროპულ ქვეყანაში", _მიმართა მოსახლეობას ივანიშვილმა.