საქართველოს პრეზიდენტი მიხეილ სააკაშვილი რუსი სამხედროების მიერ ბოლო დღეებში განხორციელებულ ქმედებებს კიდევ ერთხელ გამოეხმაურა და აღნიშნა, რომ ბოლო პერიოდში ოკუპანტები განსაკუთრებული აქტიურობით გამოირჩევიან.
პრეზიდენტმა საქართველოში მყოფ ევროკავშირის სადამკვირვებლო მისიის წარმომადგენლებს ქვეყანაში მუშაობისთვის მადლობა გადაუხადა და აღნიშნა, რომ მათი ადგილზე ყოფნა მნიშვნელოვანია, რათა არსებული მდგომარეობის შესახებ ინფორმაცია მათ პირველწყაროდან ჰქონდეთ.
"მინდა მივესალმო ევროდამკვირვებელთა მისიის ახალ ხელმძღვანელს. ბოლო დღეებში, ბოლო კვირებში, ჩვენ გვაქვს უპრეცედენტოდ დიდი აქტიურობა საქართველოს ოკუპანტებისა, რომელთაც დამატებით კიდევ რამდენიმე ასეული ჰექტარი მიწა მიითვისეს. მათ უფრო მეტი სახნავ-სათესი მიწა მიითვისეს და წაართვეს ადგილობრივებს, ვიდრე 2008 წელს. რა თქმა უნდა ეს ატარებს განსაკუთრებულად პროვოკაციულ და საშიშ ხასიათს. მე ვფიქრობ ამას აქვს პოლიტიკური მიზნები. ჩვენ ყელაფერს გავაკეთებთ იმისათვის, რომ ვიმუშაოთ ჩვენს ევროპელ პარტნიორებთან ერთად, რომ შევაკავოთ შემდგომი პროვოკაციები, შემდგომი ყაჩაღობა და გამოვიჩინოთ სიმტკიცე რათა მაქსიმალურად დავეხმაროთ ჩვენს ხალხს. ევროკავშირის დამკვირვებლების აქ ყოფნა გვეხმარება იმაში, რომ ეს ინფორმაცია იყოს ევროპული ორგანიზაციების რადარებზე და თავის პირველწყაროდან ზუსტად იცოდნენ რა ხდება, რადგან არსებული სიტუაციიდან სწორი დასკვნები გამოიტანონ. ჩვენ განსაკუთრებულად დიდ მადლობას გამოვხატავთ ამ დამკვირვებლების მიმართ, ისინი მართლაც ემსახურებიან მშვიდობის და უსაფრთხოების საქმეს,"- განაცხადა მიხეილ სააკაშვილმა.
