2014 წლის საბიუჯეტო პროექტით, ჯანდაცვის სამინისტროს დაფინანსება, მიმდინარე წელთან შედარებით, 355 მილიონით იზრდება და ჯამში, 2 მილიარდ 700 მილიონ ლარი ხდება. ეს კი მთლიანი საბიუჯეტო ხარჯების 30%-ს შეადგენს. როგორც ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე ფინანსთა მინისტრის პირველმა მოადგილემ, გიორგი თაბუაშვილმა განაცხადა, პრიორიტეტულ მიმართულებებად, მომავალი წლისათვის შრომის, ჯანმრთელობისა და სოციალური დაცვის სამინისტრო და განათლებისა და მეცნიერების სამინისტრო რჩება.
„2014 წელს გაგრძელდება 2013 წელს დაწყებული ახალი პროგრამების დაფინანსება. პენსიების, სოციალური დახმარებების გაზრდა, რაც 2013 წელს დაიწყო, მომავალ წელს სრულად, 12 თვის განმავლობაში დაფინანსდება, რამაც სამინისტროს დაფინანსების მნიშვნელოვნად ზრდა განაპირობა. სოციალური დაცვის და საპენსიო უზრუნველყოფისთვის 1 მილიარდ 902 მილიონი ლარი გამოიყოფა, საყოველთაო ჯანდაცვის პროგრამებისთვის 300 მილიონი ლარი, მოსახლეობის სხვადასხვა კატეგორების დაზღვევისთვის 280 მილიონი ლარამდე იქნება მიმართული. ჯანდაცვის სხვა პროგრამებისთვის ჯამურად, 130 მილიონი ლარის ფარგლებში იქნება გამოყოფილი", - აღნიშნა გიორგი თაბუაშვილმა.
სხდომაზე, კომიტეტის თავმჯდომარე ეკა ბესელია დაინტერესდა, პატიმართა რესოციალიზაციისთვის რა პროგრამების დაფინანსებაა ბიუჯეტით გათვალისწინებული. თაბუაშვილის განმარტებით, არის რამდენიმე პროგრამა, მათ შორის საწარმოს შექმნა, სადაც პატიმრები იმუშავებენ, მიიღებენ ხელფასს. მაგალითისთვის მინისტრის მოადგილემ რუსთავში დაარსებული საწარმო დაასახელა. ეკა ბესელია დაინტერესდა ასევე, პატიმრების კვებისთვის, იძულებით გადაადგილებულ პირთათა საცხოვრებელი პირობების გაუმჯობესებისთვის, შეზღუდული შესაძლებლობების მქონე პირთათვის ბიუჯეტის პროექტით განსაზღვრული თანხების ოდენობით. კომიტეტის თავმჯდომარის შეფასებით, ყველაზე მნიშვნელოვანია ბიუჯეტის გამჭვირვალობა.
„ბიუჯეტის პროექტი არ ტოვებს კითხვის ნიშნებს, მასში მაქსიმალური სიზუსტითაა გაწერილი ამა თუ იმ მიმართულებით რა ხარჯები უნდა იყოს გაღებული და რაც ყველაზე მნიშვნელოვანია, პროექტის პრიორიტეტი სოციალური სფეროა",-განაცხადა ეკა ბესელიამ.
