„გუდვილისა" და „მარშეს" მენეჯმენტი განცხადებას ავრცელებს, სადაც ნათქვამია, რომ კომპანიები რეაბილიტაციის რეჟიმში აგრძელებენ ფუნქციონირებას. მენეჯმენტის ინფორმაციით, ჰიპერმარკეტების პირველი ქართული ბრენდი - „გუდვილი" და მისი ცენტრალიზებული წარმოება - „მარშე" გამოწვევებს გაუმკლავდებიან და საზოგადოებას უმაღლესი ხარისხის პროდუქციასა და მომსახურებას კვლავაც შევთავაზებენ.
„ჯი-ეიჩ-ენი"„გუდვილისა" და „მარშეს" მენეჯმენტი განცხადებას უცვლელად გტავაზობთ:
„კომპანიების „გუდვილისა" და „მარშეს" მენეჯმენტები უფლებამოსილნი ვართ საზოგადოებას ვამცნოთ, რომ შექმნილი სიძნელეების გამო, ჩვენი კომპანიები რეაბილიტაციის რეჟიმში აგრძელებენ ფუნქციონირებას. ამ შემთხვევაში, როგორც შესაბამისი იურიდიული პროცედურები მოითხოვს, ჩვენ, გადახდისუუნაროდ გამოცხადების თხოვნით საქალაქო სასამართლოს მივმართეთ. სასამართლომ ჩვენი მიმართვა დააკმაყოფილა.
ჩვენი ერთგული მომხმარებლების, ჩვენი პარტნიორი მომწოდებლების და ასევე, საზოგადოდ, ქართული ბიზნესის მდგომარეობით დაინტერესებული საზოგადოების საყურადღებოდ ამთავითვე გვინდა მკაფიოდ და ცალსახად განვაცხადოთ, რომ ეს არ ნიშნავს „გუდვილისა" და „მარშეს" გაჩერებას, პირიქით, ეს არის არსებული ვითარებიდან ყველაზე ნაკლებ მტკივნეული და რაციონალური გამოსავალი. ამ პროცესის პარალელურად „გუდვილი" და „მარშე" ჩვეულებრივ აგრძელებენ მუშაობას და ჩვეულებრივ ემსახურებიან კლიენტურას.
რეაბილიტაციის რეჟიმში არაერთი წარმატებული, მსოფლიო დონის კომპანია შესულა და ეს ფორმატი მიღებული პრაქტიკაა საერთაშორისო ბაზრისთვის. ამ ეტაპზე კომპანიები „გუდვილი და „მარშე ბევრჯერ აპრობირებულ გზას გაივლიან და ვალების რექსტრუქტურიზაციის პარალელურად გააგრძელებენ უწყვეტად მუშაობას.
რეაბილიტაციის რეჟიმში გადასვლა, - ეს გადაუდებელი აუცილებლობა, წარმოშვა იმ მდგომარეობამ, რომელშიც ბევრი ობიექტური მიზეზის გამო აღმოვჩნდით. ცხადია, „გუდვილი" და მისი ცენტრალიზებული წარმოება - „მარშე" მომწოდებლებისა და ბანკის წინაშე არსებულ მიმდინარე ვალდებულებებს ჩვეულ რეჟიმში, უპრობლემოდ ემსახურებიან. მაგრამ, ჩვენი ძირითადი პრობლემაა იყო ის, რომ მიმდინარე ეტაპზე კომპანიების ფინანსური შესაძლებლობებით ვეღარ ხერხდებოდა მომწოდებლების მიმართ დაგროვილი დავალიანების მომსახურება.
სწორედ ამიტომ, შექმნილი ვითარებიდან გამოსავლის გზად მოინახა ამ ეტაპზე კომპანიების გადახდისუუნაროდ გამოცხადება და შემდგომი რეაბილიტიცია.
მოხარული ვართ, რომ ჩვენი პარტნიორების და მომწოდებლების აბსოლუტური უმრავლესობა, გაგებით შეხვდა შექმნილ ვითარებას და ჩვეულ რეჟიმში აგრძელებენ ჩვენთან წლობით ნაცად ურთიერთობას.
ბუნებრივია, ჩნდება კითხვა, თუ რამ გამოიწვია ამ მდომარეობამდე მისვლა.
აქ თავს იყრის ობიექტური ფაქტორების და გარემოებების მთელი რიგი ერთობლიობა. კერძოდ, - მოყოლებული 2004 წლიდან, „გუდვილის" ბაზარზე გამოჩენის შემდეგ, ჩვენს კომპანიას არაერთხელ მოუხდა არამიზნობრივი ხარჯების გაწევა. ისეთი ხარჯების, რომელიც არანაირი ლოგიკით არ ჯდებოდა კომპანიის ბიზნეს-ინტერესებში და განვითარების სტრატეგიაში. საერთო ჯამში, ასეთი ხარჯების მთლიანი მოცულობა 30 მლნ ლარს აჭარბებს. სხვადასხვა ეტაპზე ასეთი მძიმე გადაწყვეტილებების მიღება საჭირო ხდებოდა, რადგან სხვა შემთხვევაში შეუძლებელი იქნებოდა არათუ ბიზნესის განვითარებაზე ზრუნვა, არამედ მისი შენარჩუნებაც კი. რომ აღარაფერი ითქვას ბიზნესის მფლობელთა და ტოპ მენეჯერთა თავისუფლებასა და უსაფრთხოებაზე. ამ ერთგვარი ხარკის გაღებებით მოხდა ის, რომ კომპანიებმა შეძლეს არსებობა.
ცალკე აღსანიშნია „გუდვილის" ცენტრალიზებული წარმოება - „მარშეს" პროექტი, რომელიც თავისი ულტრთანამედროვე ტექნოლოგიური ინფრასტრუქტურით უნიკალური წარმოებაა მთელი ამიერკავკასიის მასშტაბით და მსოფლიოში სადღეისოდ დადგენილ უკლებლივ ყველა სტანდარტსა და ნორმას შეესაბამება. ზემოთ აღნიშნულმა ფაქტორებმა „მარშეს" განვითარებაზეც ნეგატიური ასახვა ჰპოვა, რამაც თავის მხრივ „მარშე" არასახარბიელო მდგომარეობამდე მიიყვანა.
საბედნიეროდ, დღეს უკვე თამამად შეიძლება ითქვას, რომ სახელმწიფოს მხრიდან ბიზნესში ჩარევა და ბიზნესიდან სახსრების „ქირურგიული წესით" ამოღება მოსალოდნელი აღარ არის. უკვე თამამად შეგვიძლია იმის თქმაც, რომ ჩვენმა კომპანიებმა გაუძლეს ყველა გამოცდას და ყველა გამოწვევას და დღემდე მოვედით ჩვენს მომხმარებლებთან და პარტნიორებთან ერთად.
დარწმუნებული ვართ, ამ გამოწვევასაც, როგორც ყველა წინა სიძნელეს, ჰიპერმარკეტების პირველი ქართული ქსელი „გუდვილი" და მისი ცენტრალიზებული წარმოება „მარშე", სათანადოდ გავუმკლავდებით და სულ მოკლე ხანში დავიწყებთ ჩვენს საინვესტიციო პორტფელში არსებული ახალი და მასშტაბური ბიზნეს-პროექტების განხორციელებას. ამ მოლოდინს გვიძლიერებს მთავრობის მხრიდან დეკლარირებული მოდგომა, რომ ბიზნესის დატერორების დრო დამთავრდა და რომ მთავრობა საკუთარი უფლებამოსილების ფარგლებში, პირიქით, აქტიურად ითანამშრომლებს ბიზნესთან ამა თუ იმ მიზეზით ობიექტური გარემოების გამო წარმოქმნილი პრობლემების დაძლევის მიზნით. ამ მხრივ გვეიმედება ახალშექმნილი თანაინვესტირების ფონდის და ასევე საპარტნიორო ფონდის შესაძლებლობები. მათთან თანამშრომლობით, ვფიქრობთ, გაცილებით მოკლე დროში დავძლევთ შექმნილ ვითარებას.
დიდი მადლობა ჩვენს ყველა მომხმარებელს ერთგულებისთვის, დიდი მადლობა ჩვენს ყველა პარტნიორსა და მომწოდებელს თანამშრომლობისა და ურთიერთპატივისმცემლური ურთიერთობისთვის.
ღრმად ვართ დარწმუნებული, რომ ერთობლივი ძალისხმევით, ჰიპერმარკეტების პირველი ქართული ბრენდი - „გუდვილი" და მისი ცენტრალიზებული წარმოება - „მარშე", ამ გამოწვევის გამკლავებასაც იოლად შევძლებთ და საზოგადოებას კვლავაც შევთავაზებთ უმაღლესი ხარისხის პროდუქციასა და მომსახურებას.
„გუდვილი" და „მარშე „ ჩვეულ რეჟიმში განაგრძობს მუშაობას და ელოდება თავის ერთგულ მომხმარებელს"- ნათქვამია განცხადებაში.
