„კანარგოს", ნინოწმინდის სალიცენზიო ბლოკზე, გეოფიზიკური სამუშაოების დაწყება უგვიანდება, რაც თავის მხრივ ადგილობრივი მოსახლეობის მხრიდან შექმნილ პრობლემებს უკავშირდება. კომპანიას უკვე აქვს 2013-2015 წლების გაწერილი გეგმა, რომლის მიხედვითაც, ნინოწმინდის სალიცენზიო ბლოკზე გეოფიზიკური სამუშაოები უნდა ჩაეტარებინა და შემდგომ ჭაბურღილების გათხრა დაეწყო, თუმც კომპანიას ადგილობრივმა მოსახლეობამ პრობლემები შეუქმნა, რადგანაც ამ ტერიტორიაზე წყალშემკრები ნაგებობაა განთავსებული და მოსახლეობა „კანარგოს" სამუშაოების ჩატარების უფლებას არ აძლევს. თავის მხრივ კი სახელმწიფო ვალდებულია, (არსებული ხელშეკრულების საფუძველზე) ინვესტორს ყველა პირობა შეუქმნას ოპერირებისთვის, რაც ამ დროისათვის არ სრულდება და ინვესტორი საქმიანობის გაგრძელებას ვეღარ ახერხებს.
ხშირად ასეთი თემებით სპეკულირება წინასაარჩევნოდ ხდება და კომპანიაში მიიჩნევენ, რომ არჩევნების შემდგომ სიტუაცია დარეგულირდება, თუმც სავარაუდოდ კომპანიას საკუთარი გეგმების გადახედვა და სამუშაოების დროში გახანგრძლივებაც მოუწვევს.
აღსანიშნავია, რომ კომპანიამ გასულ წელს 100 მლნ ინვესტიცია მოიზიდა და ამ თანხის 60 %-ის დახარჯვას ნინოწმინდის სალიცენზიო ბლოკზე შემდგომი სამუშაოებისთვის გეგმავდა.
„კანარგო" ნინოწმინდის სალიცენზიო ბლოკზე 1996 წლიდან ოპერირებს. 2012 წელს ჩვენს მიერ მოხდა 100 მლნ დოლარის ინვესტიციის მოზიდვა, საიდანაც 60 მლნ დოლარამდე უშუალოდ ნინოწმინდის სალიცენზიო ბლოკზე უნდა დაიხარჯოს. ჩვენთვის მნიშვნელოვანია, რომ ნინოწმინდის საბადოზე მოპოვება გავზარდოთ, საუბარია მოპოვების არა 10-20 %-იან ზრდაზე, არამედ, თუ გამართლდა, საუბარია მოპოვების 4-ჯერ და 5-ჯერ გაზრდაზე. ამ ეტაპზე მნიშვნელოვანია, რომ 430 კილომეტრის რადიუსში გეოფიზიკური სამუშაოები ჩატარდეს, რათა მოხდეს შემდეგი სამუშაოების სწორად დაგეგმვა და ჭაბურღილების გაბურღვა"- აცხადებს Blake Oil and Gas Limited-ის წარმომადგენელი საქართველოში, „კანარგო ჯორჯიას" ხელმძღვანელი მიხეილ ნიბნაძე.
როგორც ნიბლაძე განმარტავს, მოსახლეობა შიშობს, რომ კომპანიის მიერ სამუშაოების დაწყებით, მათ წყალმომარაგებას პრობლემები შეექმნება, თუმც კომპანია პირობას დებს, რომ დაზიანების შემთხვევაში ინფრასტრუქტურას აღადგენს და უფრო მეტიც დამატებითი ინფრასტრუქტურის შექმნაშიც ჩადებს ინვესტიციას.
„ჩვენი სალიცენზიო ბლოკი მდებაროებს ნინოწმინდის აღმოსავლეთის მხარეს. ამ ტერიტორიაზე ჯერ კიდევ კომუნისტების დროს იყო წყალშემკრები ნაგებობა, რომელიც საგარეჯოს მოსახლეობას სასმელი წლით ამარაგებდა. მოსახლეობა შიშობს, რომ ჩვენს მიერ ჩატარებული სამუშაოების შედეგად მოხდება მათი დაწამლვა და სხვადასხვა დაავადებების გავრცელება. ეს თემები ყოველთვის ძირითადად არჩევნების წინ აქტიურდებოდა. მოსახლეობა აცხადებს, რომ თუ კომპანიას ამ ტერიტორიაზე შეუშვებს, რომელზედაც ჩვენ თავის მხრივ ნებართვას ვფლობთ, წყალი დაიკარგება. ჩვენ ვცდილობთ, რომ მოსახლეობა დავარწმუნოთ, რომ ეს ასე არ მოხდება და რომ წყალი მათ უპრობლემოდ მიეწოდებათ, თუმც ისინი კოოპერირებაზე არ მოდიან.
ჩვენ შეთავაზებაც გვქონდა, რომ თუ კი ჩვენი მხრიდან რაიმე დაზიანდებოდა აუცილებლად აღვადგენდით. გვქონდა ასევე შეთავაზება, რომ თუ კი საქმე კარგად წაგვივიდოდა და ამ ტერიტორიაზე ნავთობი აღმოჩნდებოდა, მაშინ ჩვენ ინფრტასტრუქტურის გაუმჯობესებაზეც ვიზრუნებდით. სამწუხაროდ ჯერჯერობით ეს მოლაპარაკებები წინ ვერ წავიდა"- აცხადებს ნიბლაძე.
მისივე განმარტებით, როდესაც სახელმწიფომ „კანარგოზე" ნებართვა გასცა, ვალდებულება აიღო, საჭიროების შემთხვევაში კომპანიას მხარში ამოუდგებოდა.
როგორც მიხეილ ნიბლაძე აცხადებს, გეოფიზიკური სამუშაოების დაწყება კომპანიისთვის უმნიშვნელოვანესია, რადგანაც ამით ზიანს მიიღებს როგორც კომპანია ასევე თავად სახელმწიფოც, რადგანაც მოპოვებული ნავთობისა და გაზის თითქმის ნახევარი, კონტრაქტის საფუძველზე, სახელმწიფოს კუთვნილებაა.
„ის სამუშაოები რაც დღემდე ჩაგვიტარებია, წყალში გადაყრილი იქნება თუ გეოფიზიკურ სამუშაოებს ვერ ჩავატარებთ, რადგან სამომავლოდ ბურღვას ვერ დავგეგმავთ და შესაბამისად იმ მოპოვებასაც ვერ მივიღებთ - რაც გეგმაში გვაქვს.
ჩვენს მიერ დამტკიცებულია, 2013-2015 წლების პროექტი, რომელიც მოიცავს გეოფიზიკურ სამუშაოებსაც და ბურღვის დაწყებასაც. ჩვენ გეგმით გათვალისწინებული გვქონდა, რომ გეოფიზიკური სამუშაოები წელს დაგვეწყო, თუმც როგორც ჩანს ეს პროცესი მომავალი წლისთვის გადაიდება.
ჩვენი დასკვნებით გეოფიზიკური სამუშაოები ამ ტერიტორიაზე არაფრის დაზიანებას არ გამოიწვევს, თუმც თუ მოხდა და დაზიანდა ჩვენ სატანადო ვალდებულებასაც ავიღებთ. აქედან გამომდინარე მე ლოგიკური თვალსაზრისით პრობლემას ვერ ვხედავ. უბრალოდ დროში გადაიწევს"- აცხადებს ნიბლაძე.
შეგახსენებთ, რომ Blake Oil and Gas Limited არის ნავთობის და გაზის კერძო კომპანია, რომელიც ჩამოყალიბდა 2009 წელს და მიიღო საქართველოში 1998 წლიდან მოქმედი „CanArgo Energy Corporation"-ის აქტივები. მისი აქციების საკონტროლო პაკეტის მფლობელია, ბრიტანეთის კუნძულებზე, გერენზიში რეგისტრირებული ნავთობსა და გაზზე ორიენტირებული კერძო საინვესტიციო კომპანია „Persistency Private Equity Limited"-ი. კომპანია საქართველოში მოქმედებს 100% მფლობელობაში მყოფი შვილობილი კომპანიის შ.პ.ს. კანარგო ჯორჯიას საშუალებით. ჯგუფმა საქართველოში 200 მილიონის დოლარის ინვესტიცია უკვე განახორციელა.
აღსანიშნავია, რომ კომპანიას ახალი ინვესტორიც ყავს - MND Group NV, რომელიც წარმოადგენს ჩეხეთის უდიდეს ნავთობისა და გაზის კომპანიას. თავის მხრივ MND Group NV წარმოადგენს KKCG-ის საინვესტიციო ჯგუფის 100% მფლობელობაში მყოფ კერძო კომპანიას. MND Group-ის ბიზნესი ორიენტირებულია: ნავთობისა და გაზის ძიებაზე, ათვისებასა და მოპოვებაზე (ქვეყნის შიგნით და მის გარეთ), ბურღვასა და მომსახურებაზე, გაზის მიწისქვეშა საცავის მშენებლობაზე, მენეჯმენტსა და ოპერაციებზე.
2012 წლის ივლისში Blake Oil and Gas Limited -მა და MND-მ ჩამოაყალიბეს სტრატეგიული პარტნიორობა კანარგოს საქართველოს აქტივების შემდგომი ექსპლუატაციის მიზნით. ამ პარტნიორობის ფარგლებში რეგიონში განხორციელდება 100 მილიონი დოლარის ინვესტიცია (მათ შორის შესაძლო ვალდებულებები, რომლებიც წარმატების შემთხვევაში შეიძლება დამტკიცებულ ვალდებულებებში გადაიზარდოს) ნინოწმინდის საბადოს ათვისების დაჩქარებისა და მანავისა და ნორიოს ნავთობის აღმოჩენის შეფასების მიზნით.
