საქართველოში შესაძლოა კიდევ ერთი ახალი ფონდი შეიქმნას. ებრაული კომპანია Elenilto Group-ი გამოდის ინიციატივით, რათა ქვეყანაში ენერგეტიკის განვითარების 2,5 მლრდ დოლარის ბიუჯეტის მქონე ფონდი ჩამოყალიბდეს. როგორც Elenilto Group-ის წარმომადგენელი და Elenilto Georgia-ს დამფუძნებელი დავით ალონი განმარტავს, კომპანია მზადაა ფონდში თავად 0,5 მლრდ დოლარი ჩადოს, დანარჩენს კი ის პარტნიორები ჩადებენ, რომელთაც ამ ფონდში ინვესტირების სურვილი და შესაძლებლობები ექნებათ. დავით ალონის განმარტებით, ვიდრე Elenilto Georgia ფონდის შექმნაზე საბოლოო გადაწყვეტილებას მიიღებს, მანამდე კომპანიამ გარკვეული სტატისტიკული და ეკონომიკური ინფორმცია უნდა გაანალიზოს და ამის შემდეგ მიიღოს გადაწყვეტილება. ინფორმაციის მოძიებას რამდენიმე თვე შეიძლება დასჭირდეს, თუმც კომპანიაში საბოლოო გადაწყვეტილების მიღებას წლის ბოლომდე ვარაუდობენ.
„დღესდღეობით ჩვენ ვართ ეკონომიკური რენტაბელურობის შემოწმების სტადიაში. კომპანიის მენეჯმენტს უკვე გაცემული აქვს განკარგულება, რომ კომპანიის ეკონომიკურმა დეპარტამენტმა მოიძიოს ეკონომიკური მონაცემები და სტატისტიკური ინფორმაცია, თუ რა ხდება ქვეყანაში ბოლო პერიოდის განმავლობაში, რა პერსპექტივები აქვს სახელმწიფოს საერთაშორისო მიმართულებით. თუ კი ინფორმაცია და შესაბამისად ეკონომიკური მაჩვენებლები იქნება დადებითი რენტაბელურობის თვალსაზრისით, ჩვენ მატერიალურ პრობლემებს ვერ ვხედავთ. თუ კი სამომავლოდ პროექტში მონაწილეობა სხვა ინვესტორებს არ ენდომებათ, ეს სულ სხვა საკითხია"- აცხადებს Elenilto Georgia-ს ხელმძღვანელი.
როგორც დავით ალონი განმარტავს, ფონდი დააფინანსებს ყველა მნიშვნელოვან ენერგეტიკულ პროექტს, რომელიც ხელს შეუწყობს საქართველოს როგორც ენერგეტიკული ასევე ეკონომიკური განვითარების კუთხით.
აღსანიშნავია, რომ თავად Elenilto Georgia არის XI-H სალიცენზიო ბლოკის მიმდინარე კონტრაქტორი და ახორციელებს მინიმალური სამუშაო პროგრამის I ეტაპს (6 თვე) თავის მხრივ კი XI-H ბლოკზე 1996 - 2012 წლებში სალიცენზიო კონტრაქტებით სამუშაოებს აწარმოებდნენ კომპანიები: „იორის ველი" და „კანარგო". როგორც Elenilto Georgia-ში განმარტავენ, მათი მუშაობის პერიოდში აღნიშნულ ბლოკზე არ ჩატარებულა სეისმოძიება და არ გაბურღილა ახალი ჭაბურღილი
Elenilto Georgia-ს ძირითადი საქმიანობა განისაზღვრა მინიმალური სამუშაო პროგრამის შესაბამისად და მთავარი აქცენტი გაკეთდა არსებული გეოლოგიური და გეოფიზიკური მასალების შესყიდვის, დამუშავების, ინტერპრეტაციის და შეფასების მიმართულებით.
