საგარეო უწყება ცხინვალის რეგიონში „მეზობელი საქართველოდან" 19 სექტემბრიდან დაწესებულ ავტოტრანსპორტის შეზღუდვაზე განმარტებას აკეთებს. როგორც საგარეო საქმეთა მინისტრის მოადგილემ დავით ჯალაღანიამ განაცხადა ქართულ მხარეს აღნიშნული საკითხი მეთვალყურეობის ქვეშ ჰყავს აყვანილი და სასურველი შედეგის მიღწევას ცდილობს.
,, ეს არის მორიგი ძალზედ მძიმე გადაწყვეტილება თუ კი განხორციელებული იქნა. მინად დაგარწმუნოთ, საგარეო საქმეთა სამინისტროს, ქვეყნის ხელისუფლების ყურადღების ქვეშ არის ამ საკითხთან მიმართებაში ჩვენთვის სასურველი შედეგის მიღწევის მცდელობა. კონკრეტულად მინდა გითხრათ, რომ ეს საუბრის საგანი იყო საქართველოში თანათავმჯდომარეების ვიზიტის დროს საგარეო საქმეთა სმინისტროში გამართული შეხვედრისას, ასევე ჩვენი თხოვნით მათ ეს საკითხი დააყენეს ცხინვალში ვიზიტისას", _განაცხადა დავით ჯალაღანიამ.
მისივე განმარტებით, აღნიშნული საკითხი დასმული იქნება ჟენევის მომდევნო რაუნდის დროს გამართულ შეხვედრაზეც.
შეგახსენებთ, რომ ოსი სეპარატისტები ცხინვალის რეგიონში „მეზობელი საქართველოდან" ავტოსატრანსპორტო საშუალებებს სექტემბრიდან აღარ შეუშვებენ. აღნიშნული დადგენილება სეპარატისტთა მთავრობამ უკვე მიიღო.
სეპარატისტები იუწყებიან, რომ მითითებული პერიოდის შემდეგ შესაბამისად შეწყდება ავტომობილებით საქონლისა და ტვირთების შეტანა.
„ადამიანებს, რომელთაც სახელმწიფო საზღვრის გადალახვის სურვილი ექნებათ საზღვრის ფეხით გადავლა მოუწევთ.
სასაზღვრო პუნქტების გავლით ნებადართული იქნება მხოლოდ იმ ნივთების გადატანა, რომლებიც პირადი მოხმარების საგნებს განეკუთვნება", _ იუწყებიან სეპარატისტები.
მათივე ინფორმაციით, „ჯერჯერობით საზღვრის გადაკვეთის გამარტივებული რეჟიმი არსებობს, იმისათვის რათა ადამიანები მიეჩვიონ ცნებას „სახელმწიფო საზღვარი". იქნება ორი ე.წ. სასაზღვრო პუნქტი. ერთი სოფელ რიკში ხოლო მეორე სოფელ ერგნეთში.
