უკრაინის პრეზიდენტმა ვოლოდიმირ ზელენსკიმ განაცხადა, რომ დონალდ ტრამპის მიერ უკრაინასა და რუსეთს შორის ენერგეტიკული ზავის გამოცხადება მისთვის მოულოდნელი აღმოჩნდა, თუმცა თუ რუსეთი შეთანხმებას დათანხმდება, უკრაინაც მზად არის, მას შეუერთდეს.
ამის შესახებ ზელენსკიმ Axios-ის ჟურნალისტ ბარაკ რავიდთან საუბრისას განაცხადა. რავიდმა უკრაინის პრეზიდენტის კომენტარი სოციალურ ქსელ X-ზე გაავრცელა.
„პრეზიდენტმა ზელენსკიმ მითხრა: „ზავის გამოცხადება ჩემთვის მოულოდნელი იყო. თუმცა, თუ რუსები ენერგეტიკულ ზავს დათანხმდებიან, უკრაინაც დათანხმდება. თუ პრეზიდენტმა ტრამპმა პუტინთან ამაზე შეთანხმებას მიაღწია, გთხოვთ, შეგვატყობინოთ, როდის დაიწყება ზავი - ჩვენ მზად ვართ და მივიღებთ მას“, - წერს რავიდი.
11 ოქტომბერს აშშ-ის პრეზიდენტმა დონალდ ტრამპმა განაცხადა, რომ რუსეთი და უკრაინა ენერგეტიკულ ზავზე შეთანხმდნენ და ის დაუყოვნებლივ უნდა ამოქმედდეს. თუმცა, ტრამპს შეთანხმების დეტალები არ დაუკონკრეტებია.
მანამდე ზელენსკიმ განაცხადა, რომ უკრაინა მზად არის, რუსეთის ნავთობგადამამუშავებელ ქარხნებზე დარტყმები შეწყვიტოს, თუ მოსკოვი უკრაინის ენერგეტიკულ ინფრასტრუქტურაზე თავდასხმებს შეაჩერებს.
