საგარეო საქმეთა სამინისტრო ბათუმში დაკავებული იუსუფ ლაკაევის ფაქტს ეხმიანება. როგორც საგარეო უწყებაში გამართულ ტრადიციულ ბრიფინგზე საგარეო საქმეთა მინისტრის მოადგილემ დავით ჯალაღანიამ განაცხადა, ქართული მხარის მიერ შეთავაზებული წინადადება, რომ ოლიმპიადის ფარგლებში, უსაფრთხოების საკითხებში ქვეყნებს შორის შესაბამის უწყებებთან თანამშრომლობა განხორციელებულიყო რუსეთმა უპასუხოდ დატოვა.
მისივე განმარტებით, რუსეთის მხრიდან თუ რაიმე პრეტენზიას ექნბა ადგილი ის საფუძველს მოკლებული იქნება.
,, რაც შეეხება კონკრეტულ ფაქტს იუსუფ ლაკაევის დაკავებას კარგია, რომ ჩვენი სამართალდაცველი ორგანოები ასე ფხიზლად არიან. მიუხედავად იმისა, რუსეთი გადაწყვეტს თუ არა ითანამშრომლოს ამ კუთხით, საქართველოს უსაფრთხოება ჩვენი შესაბამისი სტრუქტურების მოვალეობაა. ამიტომ ეს ფაქტი თავისთავად არის დადებითი, რომ ასეთი საფრთხისაგან განეიტრალება მოხდება, თუმცა ალბათ, ეს შეფასება და ფაქტზე კომენტირება სამართალდამცავ უწყებებს უნდა დავუტოვოთ", - განაცხადა ჯალაღანიამ.
შეგახსენებთ, რომ ბათუმში დაკავებული იუსუფ ლაკაევი სოჭის ოლიმპიადისთვის საფრთხის შემცველი პირების სიაშია. ამის შესახებ სოჭის ოლიმპიადის უსაფრთხოების ოპერატიული შტაბის მონაცემებშია აღნიშნული. 81 კაციან სიაში სიაში იუსუფ ლაკაევი 48-ეა. სია ,,რასისსკაია გაზეტამ" გამოაქვეყნა.
იუსუფ ლაკაევი ბათუმში 13 სექტემბერს დააკავეს. საქართველოს შინაგან საქმეთა სამინისტროს ინფორმაციით, შსს-ს კონტრტერორისტული ცენტრის თანამშრომლებმა მიიღეს ოპერატიული ინფორმაცია იმის თაობაზე, რომ 1993 წელს დაბადებული ფირუზ წულუკიძე, ქ. ბათუმში მდებარე დროებით საცხოვრებელ ბინაში უცხო ქვეყნის მოქალაქეს მალავდა. მოქალაქე, რომელსაც წულუკიძე მალავდა, საქართველოს საზღვრის გვერდის ავლით, უკანონოდ უნდა გადაეყვანა თურქეთის რესპუბლიკაში. მათ აღნიშნულ საქმიანობაში დახმარებას ასევე ბათუმში დროებით მცხოვრები, 1969 წელს დაბადებული თემურ ბახუნტარაძე უწევდა. აღნიშნული ოპერატიული ინფორმაციის საფუძველზე, შსს-ს კონტრტერორისტული ცენტრის მიერ ჩატარდა ოპერატიულ-სამძებრო ღონისძიებები, რომლებშიც მონაწილეობა შსს-ს ბათუმის საქალაქო სამმართველოსა და აჭარის საპატრულო პოლიციის თანამშრომლებმა მიიღეს. დაახლოებით 23:00 საათზე, ქალაქ ბათუმში პუშკინისა და გრიბოედოვის ქუჩების კვეთაში, საპატრულო პოლიციის ეკიპაჟმა შეაჩერა პირი, რომელსაც ბათუმის საქალაქო სამმართველოს თანამშრომლებმა პირადობის დამადასტურებელი დოკუმენტაციის წარმოდგენა მოსთხოვეს. აღნიშნულმა პირმა ხელჩანთიდან ცეცხლსასროლი იარაღი ამოიღო და პოლიციელების მიმართულებით რამდენჯერმე გაისროლა. თავდამსხმელმა მიმალვა სცადა, რა დროსაც რამდენიმე უმისამართო გასროლა მოახდინა, რის შედეგადაც დაიჭრნენ ბათუმის საქალაქო სამმართველოს უბნის ინსპექტორ-გამომძიებელი ი.დ და მოქალაქე ე.ხ; პოლიციამ გახსნა საპასუხო ცეცხლი თავდამსხმელის მისამართით, თავდამსხმელი დაიჭრა.
სამართალდამცველებმა თავდამსხმელიც და მისი თანხმლები პირები - ფირუზ წულუკიძე და თემურ ბახუნტარაძე ადგილზევე დააკავეს.დადგინდა, რომ თავდამსხმელი რუსეთის ფედერაციის მოქალაქე, საქართველოში არალეგალურად მყოფი, 1988 წელს დაბადებული იუსუფ ლაკაევია. გამოძიება ცეცხლსასროლი იარაღის მართლსაწინააღმდეგო შეძენა-შენახვა-ტარების, საზოგადოებრივი წესრიგის დამცველის ან ხელისუფლების სხვა წარმომადგენლის მიმართ წინააღმდეგობის, მუქარის ან ძალადობის გაწევისა და პოლიციელზე ან ხელისუფლების სხვა წარმომადგენელზე თავდასხმის ბრალდებით მიმდინარეობს, რაც გათვალისწინებულია სსკს-ს 236-ე მუხლის 1-ლი და მე-2 ნაწილებით, 353-ე მუხლის მე-2 ნაწილით და 353 პრიმა მუხლის მე-3 ნაწილით.