აგვისტოში ივლისთან შედარებით სამრეწველო პროდუქციის მწარმოებელთა ფასების ინდექსი 0,2 პროცენტით გაიზარდა. „საქსტატის" ინფორმაციით, 2012 წლის აგვისტოსთან შედარებით ინდექსი 2,8 პროცენტით შემცირდა, ხოლო 2005 წლის საშუალოსთან შედარებით ინდექსი გაზრდილია 58,8 პროცენტით.
სტატისტიკის ეროვნულ სამსახურში განმარტავენ, რომ 2013 წლის აგვისტოში 2013 წლის ივლისთან შედარებით ინდექსის ფორმირებაზე ძირითადი გავლენა იქონია ფასების ცვლილებამ შემდეგ სექციებზე:
• სამთომოპოვებითი მრეწველობა: ფასები გაიზარდა 8,1 პროცენტით. შესაბამისად, სექციის წვლილმა ინდექსის პროცენტული ცვლილების საერთო მაჩვენებელში 0,35 პროცენტული პუნქტი შეადგინა. ფასები გაიზარდა ქვესექციაზე "სამთომოპოვებითი მრეწველობა, სათბობ-ენერგეტიკული სასარგებლო წიაღისეულის მოპოვების გარდა" (12,6 პროცენტი);
• დამამუშავებელი მრეწველობა: ფასები შემცირდა 0,2 პროცენტით, ხოლო სექციის წვლილმა ინდექსის პროცენტული ცვლილების საერთო მაჩვენებელში -0,15 პროცენტული პუნქტი შეადგინა. ფასების კლება დაფიქსირდა შემდეგ ქვესექციებზე: მეტალურგიული მრეწველობა და ლითონის მზა ნაწარმის წარმოება (-1,1 პროცენტი), ხე-ტყის დამუშავება და ხის ნაწარმის წარმოება (-7,5 პროცენტი).
2013 წლის აგვისტოში 2012 წლის აგვისტოსთან შედარებით ინდექსი ასახავს ფასების მნიშვნელოვან ცვლილებას შემდეგ სექციაზე:
დამამუშავებელი მრეწველობა: მოცემულ პერიოდში ფასები შემცირდა 3,4 პროცენტით და სექციის წვლილმა ინდექსის პროცენტული ცვლილების წლიურ მაჩვენებელში -2,84 პროცენტული პუნქტი შეადგინა. ფასები შემცირდა მეტალურგიულ მრეწველობასა და ლითონის მზა ნაწარმის წარმოებაზე (-7,4 პროცენტი), დანარჩენი არალითონური მინერალური ნაკეთობების წარმოებაზე (-9,5 პროცენტი), საკვები პროდუქტების (სასმელების ჩათვლით) და თამბაქოს წარმოებაზე (-2,0 პროცენტი). ფასების ზრდა დაფიქსირდა ქვესექციაზე "ცელულოზა-ქაღალდის მრეწველობა და საგამომცემლო საქმიანობა" (18,5 პროცენტი).
