საქართველოს საგარეო საქმეთა მინისტრის მოადგილის დავით ჯალაღანიას განცხადებით, საგარეო უწყება მიესალმება სირიის ქიმიური იარაღის განადგურების შესახებ მიღწეულ ჩარჩო-შეთანხმებას. როგორც ორშაბათის ტრადიციულ ბრიფინგზე საგარეო საქმეთა მინისტრის მოადგილემ დავით ჯალაღანიამ განაცხადა აღნიშნული შეთანხმება უპრეცედენტოა, ვინაიდან ის შესაძლებელს ხდის სირიაში არსებული ქიმიური იარაღის რაოდენობისა და ტიპის ერთობლივ აღრიცხვას.
,,საქართველო განუხრელად უჭერს მხარს მსოფლიოში მასობრივი განადგურების იარაღის მოსპობის ზოგად პრინციპებს. შესაბამისად, საქართველო მიესალმება სირიის ქიმიური იარაღის განადგურების შესახებ მიღწეულ ჩარჩო-შეთანხმებას. აღნიშნული შეთანხმება ითვალისწინებს სირიაში არსებული ყველა ქიმიური იარაღის როგორც რაოდენობის, ისე ტიპის ერთობლივ აღრიცხვას და ამისთვის კონკრეტულ და მჭიდრო ვადებს აწესებს. აღნიშნული შეთანხმების იმპლემენტაცია გამყარებული იქნება გაერო-ს უშიშროების საბჭოს რეზოლუციით. შესაბამისად, ამ ეტაპზე უმთავრესი პრიორიტეტი შეთანხმების სრული და სწრაფი იმპლემენტაციაა", _განაცხადა ჟურნალისტებთან ჯალაღანიამ.
საგარეო საქმეთა მინისტრის მოადგილემ იმედი გამოთქვა, რომ ყველა მხარე დაკისრებულ მოვალეობას ადეკვატურად შეასრულებს.
,,ვიმედოვნებთ, რომ ყველა პასუხისმგებელი მხარე შეთანხმებით განსაზღვრულ ვალდებულებებს სათანადოდ შეასრულებს", - განაცხადა ჯალაღანიამ.