საქართველოს პრეზიდენტობის კანდიდატებს ცენტრალურ საარჩევნო კომისიაში მხარდამჭერთა ხელმოწერების წარდგენის ვადა ხვალ ეწურებათ.
ქვეყნის პრეზიდენტობის მსურველებმა საარჩევნო ადმინისტრაციას მინიმუმ
26 530 მხარდამჭერის ხელმოწერა უნდა წარუდგინონ, რის შემდეგაც მათი საარჩევნო სუბიექტებად ლეგიტიმაცია და პრეზიდენტობის კანდიდატად ოფიციალურად დასახელება მოხდება.
"უფლებამოსილ სუბიექტებს, რომლებსაც უკვე წარმოდგენილი ჰყავთ საპრეზიდენტო კანდიდატები, ვალდებულება აქვთ, რომ 17 სექტემბრის ჩათვლით ხელმოწერები წარმოადგინონ რომლის ოდენობაც დადგენილია. ამის შემდგომ ცესკო ხელმოწერებს შეამოწმებს და შესაბამისი დასვნის საფუძველზე ცენტრალური საარჩევნო კომისიის თავმჯდომარე გადაწყვეტს კანდიდატობის მსურველების რეგისტრაციის საკითხს,"- განაცხადა ცესკო-ს საზოგადოებასთან ურთიერთობის სამსახურის უფროსმა ეკა აზარაშვილმა.
ამ დროისთვის ცესკო-ში ოფიციალურად პრეზიდენტობის 8 კანდიდატია დარეგისტრირებული. საპრეზიდენტო არჩევნებში მონაწილეობისათვის საარჩევნო ადმინისტრაციას 54-მა პრეტენდენტმა მიმართა. მათგან 15-ს პრეზიდენტობის კანდიდატად დარეგისტრირებაზე უარი ეთქვა, დანარჩენების მიერ წარდგენილი ხელმომწერთა სიები კი, 10 დღის ვადაში გადაიხედება და მხოლოდ ამის შემდეგ გახდება ცნობილი რამდენი კანდიდატი ჩაერთვება საარჩევნო მარათონში.
