სრულიად საქართველოს კათოლიკოს პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია მეორეს განცხადებით, საქართველოს პრემიერ-მინისტრ ბიძინა ივანიშვილთან შეხვედრისას მან პრემიერს სთხოვა, რომ სპეციალური ფონდი ჩამოყალიბდეს, რომელიც გარემოს გამწვანებას შეუწყობს ხელს და მოხალისეს თითოეული ნერგის დარგვისთვის 50 თეთრი გადაეცემა.
როგორც პატრიარქმა დღევანდელ საკვირაო ქადაგებაზე აღნიშნა, ამ ფონდს პრემიერ-მინისტრის მეუღლე ეკატერინე ხვედელიძე ჩაუდგება სათავეში.
"ბატონი ბიძინა ოპტიმისტია, ოპტიმისტურად უყურებს ჩვენს მომავალს. დიდ ყურადღებას აქცევს როგორ შეიძლება, რომ გაჩნდეს სამუშაო ადგილები, რა უნდა გაკეთდეს იმისათვის, რომ აყვავდეს სოფლის მეურნეობა. მას აქვს რეალური გეგმები ამასთან დაკავშირებით. ჩვენ უნდა დავუბრუნდეთ შრომას. ჩვენ არ უნდა ვიფიქროთ ის, რომ ვიღაც ჩინელი ან ინდოეთიდან მოსული ან სხვა ქვეყნებიდან მოსული დაამუშავებს ჩვენს მიწას. ამიტომ, მე შევთავაზე ბატონ ბიძინას რომ ჩამოყალიბდეს ფონდი, რომელიც მოემსახურება ტყის განაშენიანებას. სათავეში ჩაუდგეს ამას ქალბატონი ეკატერინე ხვედელიძე. ვთხოვე ბატონ ბიძინას, რომ ჩვენი ახალგაზრდები, რომლებიც ამოიღებენ და დარგავენ ამ ნერგს, დარგულ ნერგზე მიცეს მათ 50 თეთრი. ღმერთმა ინებოს, რომ მოგვეცეს ძალა, უნარი, გონება, გული გონიერი რომ ყველაფერი გავაკეთოთ ღვთის სადიდებელი,"- განაცხადა ილია მეორემ.