ქალაქ თბილისის მერის გიგი უგულავას განცხადებით, საქართველოს მთავრობის მიერ დედაქალაქის შემოვლითი რკინიგზის პროექტის მშენებლობის დაკონსერვების თაობაზე მიღებული გადაწყვეტილება ყოვლად გაუმართლებელია, რადგან ამ პროექტს მოქალაქეებისთვის რამდენიმე მნიშვნელოვანი დისკომფორტი უნდა აღმოეფხვრა.
როგორც უგულავამ თბილისის შემოვლითი რკინიგზის ერთ-ერთ მონაკვეთზე სტუმრობისას აღნიშნა, ახალ სალიანდაგო სისტემას დედაქალაქის ტერიტორიაზე სამი ძირითადი პრობლემა უნდა აღმოეფხვრა - ქალაქის ცენტრში გამოთავისუფლებულ ტერიტორიაზე საავტომობილო მაგისტრალი განთავსდებოდა, რომელიც თბილისს საცობებისგან გაათავისუფლებდა, რკინიგზის ხაზის გასწვრივ მოსახლეობას ხმაური არ შეაწუხებდა და ასევე, შემოვლითი რკინიგზის მეშვეობით, ქალაქის გარემო ყოველდღიურად ათიათასობისთ ტონა ნავთობპროდუქტების გადაზიდვის შედეგად გამოყოფილი მავნე ნივთიერებებისგან დაცული იქნებოდა.
"ამ პროექტს აქვს სამი კომპონენტი. ერთი მთავარი კომპონენტი არის ის გამოთავისუფლებული 10 ჰექტარი ტეიტორია, სადაც რეალურად თბილისის განვითარების რესურსია. მეორე ამის კომპონენტი არის ის, რომ რკინიგზის გარშემო მაცხოვრებელი ადამიანებისთვის გაუსაძლისია, მათ პრაქტიკულად რელსებზე სძინავთ და ძირითადად ყველა სახლი ავარიულია. ამიტომ, მათთვის ეს სასიცოცხლო მნიშვნელობის პროექტი იყო. მესამე და მთავარი კომპონენტი არის უსაფრთხოება. ყოველდღიურად დაახლოებით, 10 000-ობით ტონა ნავთობპროდუქტები გადაიზიდება მთელი ქალაქის მასშტაბით,"- განაცხადა გიგი უგულავამ.
შეგახსენებთ, რომ საქართველოს მთავრობის გადაწყვეტილებით, თბილისის შემოვლითი რკინიგზის პროექტის მშენებლობა დაკონსერვდა. აღნიშნული პროექტის საერთო ღირებულება 280 მილიონ ევროს შეადგენს და სამუშაოების 80% უკვე შესრულებულია.
