3 სექტემბერს, თბილისში მიმდინარე ამბასადორიალის ფარგლებში, საქართველოს საგარეო საქმეთა სამინისტროში გაიმართება ღონისძიება საზღვარგარეთ საქართველოს დიპლომატიური წარმომადგენლების ხელმძღვანელთა მეუღლეებისთვის.
პროგრამის მიზანია ხელი შეუწყოს ელჩების მეუღლეთა ჩართულობას დიპლომატიური მისიების საქმიანობაში, მათ გააქტიურებას საზღვარგარეთ საქართველოს კულტურის, ისტორიისა და მიღწევების წარმოჩენისა და პოპულარიზაციის მიზნით.
პროგრამის ფარგლებში გამართულ საინფორმაციო შეხვედრებზე სამინისტროს თანამშრომლები ქალბატონებს გააცნობენ საქართველოს საგარეო პოლიტიკურ პრიორიტეტებს, ქვეყანაში მიმდინარე დემოკრატიულ რეფორმებს, ასევე ადგილსამყოფელ ქვეყნებში მათ სამართლებრივ უფლებებს.
ღონისძიებას მოწვეულის სტუმრების სახით დაესწრებიან საქართველოში აკრედიტებული ელჩების მეუღლეები; მათ საშუალება ექნებათ ჩაერთონ პროგრამის მიმდინარეობაში, მოისმინონ საინტერესო ლექციები საქართველოს კულტურის, ხელოვნების, ისტორიის შესახებ.
ღონისძიების დასკვნით ნაწილში, რომელიც ზურაბ წერეთლის სახელობის თანამედროვე ხელოვნების საგამოფენო ცენტრში გაიმართება, წარმოდგენილი იქნება ქართული ტრადიციული სამოსი და ქართველ დიზაინერთა კოლექციის ჩვენება.
დღის ბოლოს, პროგრამის მონაწილეები დაესწრებიან რუსთაველის თეატრში ლიანა ისაკაძის კონცერტს „კულტურა საზღვრებს გარეშე".
მასალის გამოყენების პირობები